Kryetari i Partisë Socialdemokrate (PSD), Shpend Ahmeti ka folur për rezultatin e dobët të partisë së tij në zgjedhjet e parakohshme të 6 tetorit, në të cilat PSD-ja garoi në koalicion me Aleancën për Ardhmërinë e Kosovës.
Ahmeti ka thënë në televizionin T7, se prej momentit që ka nënshkruar koalicion me partinë e Ramush Haradinajt, PSD-ja ka humbur 5 për qind të votave.
“E kemi paguar faturën e PAN-it”, është shprehur ai, duke iu referuar ish-koalicionit që qeverisi vendin, PDK-AAK-Nisma-AKR.
“PAN-i është ndëshkuar. Ka qenë votë për ndryshimin”, është shprehur Ahmeti.
Ahmeti ka thënë se bazuar në sondazhe, ka pritur se koalicioni AAK-PSD do të siguronte të paktën 14 për qind të votave, apo 16-17 vende në Kuvendin e Kosovës.
Ai po ashtu ka deklaruar se koalicioni me AAK-në e Ramush Haradinajt i ka kushtuar shumë partisë së tij.
“Kritikën më të madhe si PSD e kemi pasur për koalicionin”, është shprehur Ahmeti.
“S’mund të depërtonim. Prishtina kishte revoltë kundër PAN-it, s’po them kundër Ramushit”, ka deklaruar Ahmeti.
