Jo vetëm fshatrat, por edhe vetë zona urbane e bashkisë së Pukës duket e shkretë. Shpopullimi për shkak të kushteve sociale ekonomike vit pas viti ka sjellë një situatë që kërkon një vëmendje të veçantë. Ndaj kësaj problematike që po shuan dalë ngadalë jetën në territorin e bashkisë së Pukës, ka reaguar edhe Myftinia e qytetit. Imami tregon se Puka rezulton se ka pasur më shumë banorë në vitet 1930 sesa tani.
“Por ajo që unë mund të them se është e frikshme numri i banorëve i vitit 2023 nëse do të krahasohet me atë të viti 1930-s në vitin 1930 rrethi Pukë ka pas 14.400 banorë afërsisht. Pra, ne momentalisht ne jemi më pak se çkemi qenë në vitin 1930. Pra është një diçka të cilën ne duhet ta shikojmë edhe do të në kuptimin e mirë të fjalës, duhet të gjithë të alarmohemi dhe të ta studiojmë cilat janë shkaqet reale, cilat janë ato faktorë që kanë ndikuar. Sepse atëherë ne, nëse nuk e bëjmë këtë studim, nëse vazhdohet edhe ky trend, do të jetë një hemorragji e jashtëzakonshme”, thotë Myftiu i Pukës, Gëzim Kopani.
Situata pranohet edhe nga Bashkia e Pukës. Sipas nënkryetarit, gjendja faktike e popullsisë është gati tre herë më pak sesa regjistrat e gjendjes civile, ndërsa nënvizon shkaqet kryesore si dhe mungesën e mbështetjes për financimin e programeve që mund të frenonin këtë shpopullim.
“Realiteti është i hidhur. Ne kemi një popullsi në gjendjen civile këtu afërsisht rreth 15.600 banorë në të regjistruar në gjendjen civile, ndërkohë që faktikisht me census kemi dalë 6100. Ka fshatra që për një urë kanë lëvizur thuajse i gjithë fshati se s’është bërë një urë. E ndonëse bashkia ka bërë një seri projektesh, unë e kam ngritur zërin edhe në prefekturë edhe në institucione të tjera që mungesa e investimeve në këto projekte infrastrukturore për ura, për rrugë, auto ka bërë të mundur që këto zona shpopullohen. Duke u shpopulluar vjen edhe numri i nxënësve në institucionet arsimore. Me thënë të drejtën lënë shumë për të dëshiruar domethënë mbështetja që kemi pas nga institucionet qendrore për investime në infrastrukturë edhe në çështje të tjera që rrisin pjesën e interesit për Pukën”, thotë Ferit Ringaj.
Tashmë fshatrat përveç popullimit po vuajnë edhe degradimin dhe shembjen e banesave duke i kthyer thjesht në toponime të emrave të dikurshëm.