Pas ngjarjes tragjike të së hënës, në bazën ushtarake kamp Adazi në Letoni, ministria shqiptare e Mbrojtjes ka nisur një task forcë me urgjencë drejt këtij vendi.
Grupi përbëhet nga përfaqësues nga agjencia e inteligjencës dhe Sigurisë së Mbrojtjes, Policia Ushtarake dhe Drejtoria e Inspektimit ne Ministrinë e Mbrojtjes dhe do të punojë për rrethanat e ngjarjes, mbledhjen e provave etj.
Në bazën ushtarake Adazi, ku si pasojë e një shpërthimi humbi jetën 32 vjecçarja Zarife Hasanaj dhe u lënduan Klodian Tanushi dhe Julian Kapaj, trajnimi është ndërprerë. Komandanti i forcave kombëtare letoneze, Leonid Kalnins, konfirmoi në një konferencë për shtyp se gjendja e dy të lënduarve është jashtë rrezikut për jetën.
Ai, së bashku me kolonelin kanadez, Josh Major, nuk kanë dhënë detaje të ngjarjes dhe sipas mediave letoneze mbetet ende e paqartë nëse mjeti që kishte shpërthyer, i përkiste një stërvitje të mëparshme apo bëhet fjalë për ndonjë municion të Luftës së Dytë Botërore.
Ata vetëm thanë se ka nisur një inspektim i plotë në bazë për mina të pashpërthyera, dhe deri në përfundim të tij nuk do të ketë më trajnime. Letonia është ofruar ndërkohë të bëjë transportin e trupit të pajetë të efektives shqiptare dhe dy të plagosurve, drejt Shqipërisë. Në Letoni ka mbërritur edhe Ministrja e Mbrojtjes Olta Xhaçka për të takuar dy të plagosurit.
Ngjarja e së hënës, nuk është e para në Letoni. Në tetor 2011, në një shpërthim të ngjashëm mbetën të lënduar shtatë persona, një prej të cilëve humbi jetën. Janë 20 xhenierë nga Shqipëria në shërbim në Letoni. Grupi shumëkombësh atje udhëhiqet nga Kanadaja dhe përbëhet nga 1400 ushtarë nga Shqipëria, Republika Çeke, Italia, Kanadaja, Mali i Zi, Polonia, Sllovakia, Sllovenia dhe Spanja.
Top Channel
