Në aktivitetin për konsolidimin e Këshillit të Lartë Gjyqësor dhe Gjykatës së Lartë, ambasadorja e Shteteve të Bashkuara të Amerikës përsëriti edhe njëherë thirrjen për plotësimin e sa më shpejt të vendeve vakante në këto institucione të drejtësisë që puna për drejtësinë e re të mos ndalet e të ecë sa më shpejt.
Në lidhje me reformën në drejtësi, diplomatja amerikane u shpreh se ajo me të vërtetë nuk ka qenë e lehtë dhe e përsosur, por që rezultatet kanë nisur të ndjehen nga dita në ditë.
“Reforma nuk është e lehtë, nuk është e shpeshtë, nuk është e përsosur, por po shohim rezultate.
Shikoni sa lart keni arritur. Katër vjet më parë ishte vetëm një gjyqtar. Ndërsa sot në gjykatë mungojnë vetëm 3 gjyqtarë.
Ne mund ta kuptojmë frustimin e popullit shqiptar. Drejtësia e vonuar është drejtësi r mohuar. Kemi nevojë ta bëjmë zero numrin e çështjeve të prapambetura. Plotësojeni gjykatën. Vendosi përparësi për çështjet urgjente. Njerëzit duan më shumë. SHBA është në kahun e popullit shqiptar. Ne duhet të festojmë për përparimin që kemi bërë se bashku. Çelësi është të qëndrojmë drejt qëllimit. Partnerët tuaj evropianë e amerikanë duan që ju të keni sukses”, u shpreh ambasadorja.
Në lidhje me përfundimin e mandatit të saj, Yuri Kim u shpreh se do të jetë në Shqipëri dhe pak më gjatë pa dhënë më shumë detaje.
“Unë kam 3 vite në Shqipëri dhe do të jem këtu për ca më gjatë. Kam mësuar një gjë këtu.
Ka histori këtu. Duhet të ndiejmë empati dhe respekt për historinë që ka kaluar ky vend, për përvojën e popullit shqiptar. Vendimet për drejtësinë në ndikon të gjithëve. Të gjithë njihen me njëri-tjetrin”, përfundoi Yuri Kim.
