Miqësoret ndaj Uellsit dhe Republikës Çeke do t’i shërbejnë shumë kombëtares shqiptare për sfidat zyrtare të muajit shtator ndaj Polonisë dhe Hungarisë.
I këtij mendimi ishte mesfushori i kuqezinjëve Ylber Ramadani i cili ishte një nga dy lojtarët që dolën në konferencë për shtyp këtë të enjte nga grumbullimi i kombëtares në Cardiff të Uellsit, aty ku të shtunën e 5 qershorit skuadra e Rejës do të sfidojë përfaqësuesen britanike. Sipas Ramadanit një faktor shumë pozitiv te Shqipëria e Rejas është se pjesë e ekipit janë shumë futbollistë që më herët kanë luajtur me përfaqësuesen Shpresa dhe përshtatja është më e lehtë.
“Jemi disa lojtarë si Çekiçi, Seferi, Bare etj që kemi qenë pjesë e Shpresave në të kaluarën dhe kjo është diçka shumë pozitive pasi e kemi më të lehtë përshtatjen dhe ambientimin. Çdo lojtar që vjen në kombëtare, vjen për të dhënë maksimumin, dhe këto dy miqësore do të jenë shumë të rëndësishme edhe për faktin se do ta na shërbejnë për sfidat zyrtare të shtatorit”.
Ramadani tregoi edhe disa nga kërkesat e Rejas sidomos ndaj kundërshtarëve që i japin prioritet mbrojtjes.
“ Në mbledhje trajneri na thotë që ndaj kundërshtarëve që luajnë prapa në mbrojtje si San Marino apo Andorra, duhet të provojmë më shumë me goditjet nga distanca”.
Përsa i përket mundësive që Shqipëria ka për t’u kualifikuar në Botërorin e Katarit të vitit 2022, Ramadani theksoi se shanset ekzistojnë.
“ Diskutojmë shpesh për mundësitë që kemi për të shkuar në Botëror, është një ndjesi e jashtëzakonshme, shpresoj që të bëhet realitet”.
Ylber Ramadanit në fund të këtij sezoni i përfundoi kontrata me Veljen në Danimarkë dhe mesfushorit i duhet të gjejë një destinacion të ri për të ardhmen. Ramadani nuk zbuloi asgjë për të ardhmen por theksoi se në Shqipëri do të luante vetëm për Partizanin.
“ Për të ardhmen do të vendos me menaxherin tim dhe familjen pas ndeshjeve të kombëtares. Kam oferta por ende nuk kam vendosur. Nëse do të kthehem në Shqipëri do ta bëj vetëm për Partizanin, Partizani është shtëpia ime dhe nuk mund të luaj me asnjë ekip tjetër në Superiore”. /SS/
