Shqipëria do të mbajë sot zi kombëtare për të nderuar major Klodian Tanushin, i cili ra në krye të detyrës gjatë misionit të NATO në Letoni.
Vendimi është marrë nga qeveria shqiptare.
Në nder të major Tanushit, komandant i kontingjentit shqiptar në Letoni, sot në të gjitha institucionet publike e private, flamuri kombëtar do të ulet në gjysmështizë.
Gjithashtu, Komisioni Qendror i Statutit “Dëshmor i Atdheut”, nën drejtimin e ministres së Mbrojtjes Olta Xhaçka, e shpall major Klodian Tanushin, i rënë në krye të detyrës, “Dëshmor i Atdheut”.
