Kryeministri Edi Rama theksoi sot se investimet e huaja direkte në vitin 2024 arrijnë 1,58 miliardë euro, niveli më i lartë i regjistruar ndonjëherë dhe tendenca vazhdon në rritje edhe në vitin 2025.Kreu i qeverisë mori pjesë sot në “Tirana Economic Forum”, një takim me sipërmarrës dhe ekspertë ndërkombëtarë, organizuar nën kujdesin e “Delphi Forum”, për të diskutuar mbi hapësirat për zhvillim që ofron Shqipëria. Gjatë fjalës së tij ai deklaroi sot se Shqipëria garanton stabilitet dhe qartësi për tërheqjen e investimeve të huaja, duke i ftuar sipërmarrësit e huaj që të investojnë në Shqipëri.Rama tha se Shqipëria po hyn në një kapitull të ri dhe se vendi po ngrihet dhe transformohet, duke u bërë thirrje të bëhen pjesë e historisë së suksesit përpara se të jetë vonë. Ai theksoi se kapitali nuk zgjedh rastësisht, por shkon aty ku ka stabilitet, qartësi dhe drejtim dhe se sot Shqipëria është pikërisht ky destinacion, pra një vend, një destinacion me stabilitet, me qartësi dhe drejtim.“Shqipëria po hyn në një kapitull të ri, që është sa i pëlqyeshëm aq edhe sfidues. Kemi stabilitet, ritmin, një shoqëri të re me talente e energji, kemi vullnetin për të ecur përpara.Besoni te kjo Shqipëri që po ngrihet, investoni në këtë Shqipëri që po transformohet, bëhuni pjesë e historisë së suksesit që po ndërtojmë, përpara se të jetë vonë dhe Shqipëria nuk është shumë e madhe, ndaj nxitoni përpara se hapësirat të mbyllen”, tha kryeministri Rama.Ai theksoi se realiteti ka ndryshuar dhe Shqipëria sot nuk shihet më si një cep i largët në hartë, por si një vend ku gjërat ndodhin, ku reformat nuk janë premtime, por praktika dhe ku shndërrimet dhe transformimet nuk janë slogane por fakte të përditshme.“Vendi ynë qëndron si një shtyllë stabiliteti dhe një ekonomi në rritje. Ne kemi hapur të gjithë kapitujt e negociatave me BE-në në një kohë rekord. Kemi dyfishuar GDP. Kemi gjithashtu edhe një sektor me rritje të turizmit dhe që po dominon në infrastrukturë nga portet, tek hekurudhat. Po shtyjmë transformimin digjital me një shpejtësi marramendëse”, shtoi Rama.Kryeministri u shpreh më tej se po bëjmë gjithçka duke luftuar korrupsionin dhe duke modernizuar shtetin, ndërkohë që pagat po rriten dhe industria ushtarake po rilind dhe po fillon me disa hapa shumë të mirë.“Asnjë gjë nuk ndodh si aksident dhe kjo po ndodh hap pas hapi mes punës, besimit. Historia jonë e rritjes nuk është sasiore, por është cilësore. Ne po ndërtojmë një ekonomi që matet jo vetëm prej vëllimit, por prej vlerave, prej produktivitetit e inovacionit”, shtoi Rama.
