Kostoja është kthyer në faktor vendimtar në zgjedhjen e pushimeve, duke i shtyrë udhëtarët të kërkojnë përtej destinacioneve tradicionale europiane në vende më të përballueshme ekonomikisht.
Megjithëse rritja e kostos së jetesës ka kufizuar buxhetet familjare, plot 75 për qind e britanikëve vazhdojnë ta vendosin pushimin si prioritet, sipas Raportit Global të Udhëtimeve WTM 2025.
Me 40 për qind të tyre që e shohin çmimin si “pengesën më të madhe”, udhëtarët e kujdesshëm po kërkojnë mënyra për të minimizuar dhe optimizuar shpenzimet e udhëtimit, duke marrë më shumë vlerë për paratë e tyre.
Ky ndryshim ka transformuar mënyrën se si kërkohen pushimet, duke çuar në rritjen e kërkesës për paketa me ulje çmimesh dhe oferta “all inclusive”, teksa zbulojnë një valë të re destinacionesh të lira.
Sipas raportit të përgatitur nga Tourism Economics, Shqipëria është ndër vendet që kanë shënuar rritje të jashtëzakonshme të vizitorëve, duke ofruar pushime bregdetare me një kosto shumë më të ulët krahasuar me vendet e tjera europiane.
Edhe Serbia dhe Rumania po shënojnë rritje të ndjeshme në numrin e turistëve që kërkojnë alternativa më ekonomike.
Ky trend përfshin edhe Turqinë, e cila vazhdon të tërheqë udhëtarë që duan luksozitet me çmime të përballueshme.
Përtej Europës, në Amerikën Qendrore, El Salvador po tërheq më shumë vizitorë për shkak të kostos së ulët të udhëtimit.
Ndërsa në Azinë Juglindore, Vietnami pritet të shënojë rritje të vazhdueshme të turizmit, përkrah Tajlandës dhe Filipineve.
Raporti thekson gjithashtu se Lindja e Mesme është “rajoni me rritjen më të shpejtë në botë”, me Omanin dhe Katarin që po përjetojnë një boom turistik.
Një tjetër prirje në rritje është kërkesa për destinacione më pak të mbipopulluara, teksa udhëtarët kërkojnë përvoja autentike lokale — nga turizmi kulinar e trashëgimia historike, deri te aventurat në natyrë.
Gjithashtu, shumë po shmangin sezonin e pikut veror për të evituar temperaturat ekstreme në jug të Europës.
Në Spanjë, resortet po përpiqen të zgjerojnë sezonin turistik dhe të ulin mbipopullimin, pasi udhëtarët po ndryshojnë zakonet e tyre për të shmangur nxehtësinë dhe çmimet e larta.
Një tjetër arsye që ndikon në zgjedhjen e destinacioneve është dëshira për të marrë pjesë në evenimente sportive apo muzikore, me shumë vende që po ftojnë artistë të njohur ndërkombëtarë si Coldplay, Oasis dhe Taylor Swift, për të zhvilluar koncerte në qytetet e tyre.
Drejtori menaxhues i Tourism Economics, Dave Goodger, tha gjatë panairit World Travel Market në Londër:
“Udhëtarët europianë po kërkojnë të kursejnë para, qoftë për udhëtime të shkurtra apo të gjata. Nga të gjitha anketat, del qartë se kostoja është faktori kryesor. Shpenzimet janë pengesa më e madhe dhe mbipopullimi është një tjetër shqetësim.
Udhëtarët po vendosin vlerën për para në plan të parë dhe po shohin përtej destinacioneve të zakonshme.
Shqipëria, Serbia dhe Rumania janë destinacione të reja, më të përballueshme, që po shënojnë rritje të fortë.”
Megjithëse pushuesit mund të përballen me vështirësi financiare, perspektiva për industrinë e udhëtimeve mbetet pozitive — ajo pritet të rritet më shpejt se ekonomia globale gjatë dekadës së ardhshme.
