Me përkeqësimin e shpejtë të situatës në Afganistan, problemi i refugjatëve po shfaqet përsëri. Në zonën e aeroportit të Kabulit, mijëra njerëz po grumbullohen në kërkim të një rruge arratisjeje; e njëjta gjë po ndodh në kufijtë me Iranin dhe Taxhikistanin. Sa i përket Evropës, diplomacitë aktualisht janë të ndara. Austria, për shembull, mban qëndrimin e saj të ashpër në lidhje me riatdhesimin e emigrantëve afganë dhe azilkërkuesve pavarësisht përparimit të talebanëve. Kjo u konfirmua nga Ministri i Brendshëm austriak, Karl Nehammer.
“Ata që kanë nevojë për mbrojtje duhet ta marrin atë sa më afër vendit të tyre të origjinës,”- tha ministri.
“Një ndalim i përgjithshëm i dëbimit është një faktor tërheqës për emigracionin ilegal dhe vetëm nxit aktivitetin e kontrabandistëve dhe krimit të organizuar,”- shtoi ai.
Austria ishte një nga gjashtë vendet e BE -së që këmbënguli javën e kaluar në të drejtën e tyre për të dëbuar me dhunë azilkërkuesit afganë të refuzuar. E përditshmja austriake “Osterreich” publikoi një sondazh opinioni sipas të cilit deri në 90 përqind e të intervistuarve mbështesin linjën e qeverisë për dëbimet.
Nga ana tjetër qeveria e Shqipërisë, një vend i cili vetëm 30 vjet më parë dëshmoi një largim masiv të banorëve të tij drejt brigjeve italiane,po i mirpret. Kryeministri Edi Rama e njoftoi nga Tirana dhe shprehu gatishmërinë e tij për të mirëpritur qindra refugjatë nga Afganistani.
“Jemi me NATO -n. Ata ndihmuan ushtarët tanë në misionin e tyre paqeruajtës dhe tani po rrezikojnë të masakrohen si kafshë nga talebanët,”- tha ai.
Rama bën të ditur se i është përgjigjur pozitivisht një kërkese të bërë nga Shtetet e Bashkuara sepse janë aleatë të vjetër të Shteteve të Bashkuara, jo vetëm kur kanë nevojë për problemet e tyre.
