Grupi i parë i shtetasve afganë që do të strehohen përkohësisht në Shqipëri pritet të mbërrijë në Rinas gjatë 24 orëve.
Burime për “Euronews Albania” kanë thënë se avioni i parë do të ulet me rreth 300 shtetas afganë.
Strehimi i tyre do të bëhet në objektin e studentëve në Tiranë dhe në disa hotele në Durrës.
Shtetasit e pare afganë që do të vijnë në Shqipëri janë bashkëpunëtorë të Shteteve të Bashkuara të Amerikës dhe forcave të aleancës së NATO-s, të cilëve u rrezikohet jeta pas marrjes së kontrollit të Afganistanit nga talebanët.
Shumica e tyre janë përkthyes dhe bashkëpunëtorë të niveleve të ndryshëm të strukturave amerikane në Afganistan.
Përveç Shqipërisë, pranimin e afganëve deri më tani e kanë konfirmuar Kosova, Maqedonia e Veriut dhe Kanadaja.
