Ministrja belge e Drejtësisë, Annelies Verlinden, dhe ministrja e Azilit dhe Migracionit, Anneleen Van Bossuyt, nisën të mërkurën një mision diplomatik dy-ditor në Shqipëri.
Vizita fokusohet në adresimin e mbipopullimit të burgjeve dhe luftën kundër krimit të organizuar, ku pritet një marrëveshje mes dy vendeve për transferimin e shqiptarëve që vuajnë dënime në Belgjikë drejt burgjeve shqiptare.
“Bëhet fjalë vetëm për të burgosurit me kombësi shqiptare. Do të diskutoj me ministrin e Drejtësisë për transferimin e shtetasve shqiptarë të burgosur në Belgjikë drejt burgjeve shqiptare. Ka dhjetëra shtetas shqiptarë që vuajnë dënime atje dhe ne jemi të interesuar që ti transferojmë këtu, pasi në burgjet belge ka një mbipopullim penitenciar”, deklaroi Verlinden.
Kohëve të fundit, autoritetet belge konstatojnë rritje të numrit të shqiptarëve që shkelin rregullat e Shengenit.
“Ka disa sfida në udhëtimin e shtetasve shqiptarë në drejtim të Belgjikës, fakti që mund të udhëtosh pa vizë nuk do të thotë që mund të udhëtosh pa përmbushur kushtet dhe kriteret që kërkohen për të udhëtuar. Kemi konstatuar se ka rritje të trendit, mesatarisht 400-500 shqiptar kthehen mbrapsht në kufi, mesatarisht në një vit, pasi nuk përmbushin kriteret e hyrjes”, u shpreh Anneleen Van Bossuyt.
Aktualisht, në burgjet e Belgjikës ndodhen mbi 300 shtetas shqiptarë, prej të cilëve 253 nuk kanë të drejtë qëndrimi në vend. Misioni përfshin gjithashtu intensifikimi e luftës kundër krimit të organizuar.
