Teksa Gjykata Kushtetuese pritet të dalë në një vendim përfundimtar për zgjedhjet vendore të 2019-ës, janë 6 bashki në të cilat do të zhvillohen votime të pjesshme. Bëhet fjalë për bashkitë e Shkodrës, Durrësit, Vorës, Rrogozhinës, Dibrës, Lushnjes dhe Mallakastrës, qytetarët e të cilave do të ftohen në votime për shkak se ato drejtohen nga kryetarë të emëruar dhe jo të zgjedhur. Në 4 bashki krerët e propozuar nga PS-ja rezultuan me probleme me ligjin e dekriminalizimit. Ndërsa në korrik të këtij viti do të arrestohej nga SPAK-u kryetari i Bashkisë së Lushnjës, Fatos Tushe. Ndërkohë, në Durrës kryetarja u shkarkua pas deklaratave kundër linjës së partisë, në Rrogozhinë do të mbahen zgjedhje për shkak të ndarjes nga jeta të kryebashkiakut.
Shkodra, Durrësi, Vora, Rrogozhina, Dibra, Lushnja, dhe së fundmi Mallakastra janë 6 nga 61 bashkitë, që aktualisht drejtohen nga kryetarë të emëruar dhe jo të zgjedhur nga qytetarët.
Ndonëse në zgjedhjet e vitit 2019, shkodranët ia besuan Valdrin Pjetrit drejtimin e bashkisë Shkodër, ai dha dorëheqjen nga marrja e detyrës, për shkak se prekej nga ligji i dekriminalizimit. Për pasojë Voltana Ademi, me mandat të përfunduar kushtetues prej gati dy vjetësh, vazhdon të drejtojë Bashkinë më të madhe në veri të vendit.
Pak ditë pas tërmetit të 26 nëntorit, për shkak të një deklarate të pakujdesshme, kryetarja e zgjedhur e Bashkisë së Durrësit Valbona Sako dha dorëheqjen. Ajo u zëvendësua fillimisht në postin e nënkryetares e më pas atë të kryetares nga Emirjana Sako.
Edhe Bashkia e Vorës, për shkak të problemeve të Agim Kajmakut me drejtësinë, pas një kalvari të gjatë emërimesh shkarkimesh e dorëheqjesh të drejtuesve të emëruar të saj, ka një tjetër të emëruar dhe jo të zgjedhur, Gentian Picarin.
Pas ndarjes së papritur nga jeta të kryetarit të bashkisë Rrogozhinë, ajo drejtohet nga nipi i tij, Edision Memolla, i cili nuk ka mbajtur më herët ndonjë post në këtë bashki.
Dionis Imeraj, ish-kryetari i Bashkisë Dibër dha dorëheqjen për shkak të kandidimit të tij për deputet në zgjedhjet e 25 prillit. Aktualisht kryetar i bashkisë në detyrë është Shkëlqim Murrja.
Më 6 korrik të këtij viti, kryetari i Bashkisë së Lushnjës, Fatos Tushe do të arrestohej gjatë një operacioni të ndërmarrë me urdhër të Strukturës së Posaçme Kundër Korrupsionit dhe Krimit të Organizuar (SPAK). nga Policia e Shtetit, me akuzat për korrupsion dhe keqpërdorim të detyrës zyrtare.
Ndërkohë mesditën e së hënës SPAK njoftoi procedimin penal ndaj kryebashkiakut të Mallakastrës Qerim Ismailajn pas hetimit për fshehje të dënimit të marrë në Greqi në vitin 2000.
Në një kohë që Gjykata Kushtetuese do të shqyrtojë të martën legjitimitetin e zgjedhjeve vendore të 2019-ës pas opinionit të Komisionit të Venecias, tashmë pritet që në këto shtatë bashki të shpallet nga Presidenti i Republikës Ilir Meta dhe data për mbajtjen e zgjedhjeve të pjesshme vendore.