Shtëpia e Bardhë ka thënë se presidenti Joe Biden respekton vendimin e kryetares së Dhomës së Përfaqësuesve, Nancy Pelosi për të udhëtuar në Tajvan, edhe pasi udhëheqësi amerikan fillimisht tha se Pentagoni nuk ishte dakord me udhëtimin.
I pyetur në lidhje me pikëpamjet e presidentit për vizitën e Pelosit, Koordinatori i Komunikimeve Strategjike të Këshillit të Sigurisë Kombëtare, John Kirby u tha gazetarëve të martën se Biden “respekton vendimin e Kryetares për të udhëtuar në Tajvan”, shkruan Newsweek.
“Ai e respekton vendimin e saj për të shkuar dhe ai beson se është plotësisht në përputhje me politikën amerikane që ka dekada të tëra”, tha Kirby.
Udhëtimi i Pelosit shënon udhëtimin e parë të tillë nga një kryetar i Dhomës së Përfaqësuesve në 25 vjet.
Raportet e udhëtimit të saj u zbuluan fillimisht në sferën publike përmes një artikulli të Financial Times që citonte burime të njohura me këtë çështje.
Zyra e Pelosit nuk e konfirmoi vizitën derisa ajo mbërriti në Tajvan të martën.
Administrata ka shmangur kryesisht diskutimin nëse e miratoi apo jo udhëtimin e Pelosit, i cili ka shërbyer për të rritur tensionet me Kinën.
Pekini e ka quajtur udhëtimin një shkelje të sovranitetit kinez, pasi Kina pretendon se ishulli është i veti.
Në një përgjigje të dukshme ndaj vizitës së Pelosit, Pekini ka njoftuar të enjten një seri stërvitjesh ushtarake në ujërat përreth Tajvanit.
