Një ndër shtetet me popullsinë më të madhe në botë, Filipinet, kanë dalë në përkrahje të paktit mes Shteteve të Bashkuara, Australisë e Britanisë së Madhe, duke shpresuar se kjo marrëveshje do ta mbajë baraspeshën e fuqisë në rajonin e Indo-Paqësorit.
“Fuqizimi i aftësisë së një aleati të afërt për ta projektuar fuqinë duhet ta kthejë dhe ta ruajë baraspeshën e jo ta destabilizojë atë”, deklaroi të martën ministri i Jashtëm i Filipineve, Teodoro Locsin.
Kryediplomati i Filipineve tha se pa praninë e vërtetë të armëve bërthamore, pakti i njohur si Aukus nuk do ta shkelë traktatin e vitit 1995 për të mos futur armë bërthamore në Azinë Juglindore.
Deklarata e tij përbën dallim të madh në qëndrim në krahasim me fqinjët e Filipineve, Indonezinë e Malajzinë, të cilat e ngrenë alarmin për nëndetëset me energji bërthamore dhe për rivalitetin e superfuqive që po del në pah në Azinë Juglindore, shkruan Reuters.
Ndryshe, Deti Jugor i Kinës vazhdon të jetë burim i tensioneve mes fuqive. Shtetet e Bashkuara, partnere në një traktat të mbrojtjes me Filipines, dhe aleatët perëndimorë rregullisht kryejnë operacione detare në atë pjesë. Këto veprime e kanë zemëruar Kinën.
Kina i ka cilësuar lundrimet e anijeve amerikane dhe të aleatëve si ndërhyrje në ujërat që pretendon se janë të vetat. Këto pretendime i kundërshtojnë shtetet tjera të rajonit, si Filipinet dhe Vietnami, të cilat e kanë akuzuar Kinën për frikësim të peshkatarëve dhe pengim të aktiviteteve për energjinë.
