Ish-kryetari i Parlamentit Evropian, Martin Shulc vlerëson se Bashkimi Evropian në tetor duhet të japë datë për fillimin e negociatave për Maqedoninë e Veriut dhe Shqipërinë.
“Po, definitivisht do të jetë kështu, mendoj se si personalitete duhet t’i mbajmë premtimet tona veçanërisht në jetën politike. Shpresoj se nga mesi i tetorit Këshilli do të vendosë për fillimin e negociatave inkuadruese siç ishte premtuar. Shpresoj se nuk do të anulohet sërish. Megjithatë, përvoja ime pas tre dekadash punë në institucionet evropiane dhe në politikën evropiane më tregon se asgjë nuk mund ta parashikojmë. Kështu që nuk e di se çfarë do të ndodhë”, tha Shulc, duke iu përgjigjur pyetjeve në Forumin “Ekonomist” që mbahet sot në Shkup.
Sipas tij, prej vitit 2005 e këtej liderët e vendeve të BE-së filluan të luajnë lojëra në shtetet e tyre për çështjet evropiane duke e theksuar shembullin me kryeministrin britanik, Dejvid Kameron dhe vendimin për referendum i cili konservativëve në vendin e tyre u premtoi referendum për të mbijetuar politikisht.
“Për këto arsye relativisht jam i sigurt se do të votojnë “pro” më 15 tetor. Megjithatë nëse dëshironi t’ua garantoj këtë mendoj se asnjë anëtar i Këshillit të BE-së nuk mund të garantojë. Por, duke e pasur parasysh se gjermanët dhe francezët janë “pro” shpresoj se kjo do të shkaktojë ndikim të mjaftueshëm për zgjidhjen pozitive të kësaj çështje”, theksoi Shulc.
