Tirana dhe Partizani ndanë nga një pikë në derbin e kryeqytetit, që hapi javën e 24-t të Kategorisë Superiore.
Bardheblutë dominuan pjesën e parë, ndërsa “Të Kuqtë” u treguan pak më agresivë në të dytën, por në fund asnjë nga skuadrat nuk bëri diferencën. Me pak raste në dispozicion, asnjë nuk arriti të gjente golin, që do të ishte përkthyer në 3 pikë.
Tirana gjithsesi vijon të kryesojë renditjen, tashmë me 53 pikë, 9 më shumë se Laçi i vendit të dytë, që luan të hënën kundër Kastriotit. Ndërsa Partizani mbetet në vend të pestë, me 34 pikë.
Në fillim pati shumë hedhje fishekzjarrësh dhe tymuese në fushë, që ndërprenë disa herë ndeshjen, ndërsa nuk mungoi edhe një mesazh mbështetjeje për Ukrainën, ku prej 24 shkurtit po zhvillohet luftë, me futjen e trupave ruse atje.
