Tashmë ajo është bërë e njohur si dosja 80 84 dhe në të, ish-Sigurimi i Shtetit në Shqipëri, shkruante lëvizjet e presidentit të parë të Kosovës, Ibrahim Rugova.
Për sigurimin, Rugova do të etiketohej me pseudonimin “zdrukthi” dhe kështu do të pasqyrohej në dosjet famëkeqe të diktaturës.
Gazetari Blendi Fevziu, ka publikuar për të parën herë detaje nga dosja, ku bëhet me dije se si Rugova përndiqej.
Në një pjesë të dosjes, përshkruhet rrugëtimi i tij, me pikënisje në orën 07:00, kur fillonte survejimi në ish-hotel Dajtin, në kryeqytetin shqiptar.
Lëvizjet e Rugovës jashtë hotelit, nisin në orën 09:10, kur ai edhe del nga godina dhe më pas, në orën 13:00, ai shfaqet sërish përpara hotelit.
I shoqëruar nga një person, me pseudimin “çekiçi” dhe një person tjetër, shtetas kosovar, i paidentifikuar, Rugova kanë kaluar në bulevardin “Dëshmorët e Kombit”, sipas dosjes.
Më pas, shpjegohet edhe se si ata të tre, janë parë në sheshin “Skënderbej”, apo të futen në Pallatin e Kulturës.
Survejimi vijon edhe ditën e nesërme, kur Rugova pikaset në orën 06:30 të mëngjesit, me daljen nga hotel Dajti.
Më pas, në orën 09:10, sërish, ai del nga godina dhe pas disa minutash, shihet tek monumenti Lenin, i shoqëruar sërish nga personi i njohur me pseudonimi “çekiçi” për sigurimin, i cili nuk specifikohet se kush është.
Kjo ka qenë thjesht një pjesë e dosjes, ku tregohet përndjekja që regjimi, i ka bërë ish-presidentit kosovar asokohe, duke lënë të kuptohej se asnjë figurë, pavarësisht rëndësisë kombëtare, nuk lihej pa u survejuar. /Albanianpost.com
