Europa po përshpejton përgatitjet ushtarake dhe investimet në mbrojtje, ndërsa Komisioni Europian nis një tur në shtetet lindore për të monitoruar zbatimin e planit RearmEU. Strategjia, sipas Ursula von der Leyen, synon të rrisë gatishmërinë përballë kërcënimeve, duke e konsideruar Rusinë si rrezikun kryesor për sigurinë e kontinentit.
Në të njëjtën kohë, të gjitha vendet anëtare të NATO-s kanë arritur objektivin e shpenzimeve ushtarake prej 2% të PBB-së, ndërsa deri në 2035 qeveritë do të rrisin investimet në mbrojtje deri në 5% të PBB-së, duke përfshirë edhe shpenzime për sigurinë dhe infrastrukturën.
Gjermania kryeson investimet, me kompaninë Rheinmetall që po ndërton fabrikën më të madhe të municioneve në Evropë, në Unterluss, e cila pritet të prodhojë 350 mijë njësi në vit nga 2027. Projekte të tjera të mëdha janë duke u zhvilluar në Rumani dhe Bullgari për prodhimin e pluhurit dhe predhave, duke rritur kapacitetin evropian për të prodhuar dy milionë municione në vit deri në fund të 2025.
Baltiku po fokusohet në prodhimin dhe përdorimin e dronëve. Letonia udhëheq një koalicion vendesh, ndërsa Lituania ka nisur një program edukativ për të trajnuar mbi 15 mijë civilë, përfshirë 7 mijë fëmijë, për të pilotuar dronë.
Polonia po përforcon kufijtë e saj me sistemin e Shkildës Lindore, përfshirë fushat e minave dhe fortifikimet pranë Kaliningradit.
Në fushën e industrisë së aviacionit, Franca dhe Gjermania po rilancojnë projektin Scaf për një avion gjeneratë e gjashtë, ndërsa Italia bashkëpunon me Mbretërinë e Bashkuar dhe Japoni në Global Combat Air Programme. Po ashtu, Europa po punon për të krijuar një tank unik europian me 51 kompani nga 13 vende.
Sipas strategjisë së “Përgatitjes”, disa shtete kanë nisur të planifikojnë edhe qendrat spitalore për të pritur ushtarë të lënduar, siç po bëhet në Francë pranë porteve dhe aeroporteve.
Turin e von der Leyen e mbështet edhe fondi Safe, prej 150 miliardë eurosh, për investime të përbashkëta në mbrojtje. Aktualisht 18 vende kanë aplikuar për një total prej 127 miliardë eurosh, me Poloninë në krye (45 miliardë), pasuar nga Franca, Italia dhe Rumania. Shtetet duhet të dorëzojnë planet e tyre kombëtare për investimet deri në fund të nëntorit.
