Tashmë prej disa javësh, mediat e tij, propaganda e kryeministrit apo dhe ata që i shërbejnë me devotshmëri për të kapur ndonjë kockë, po kërkojnë që në mënyra nga më të ndryshmet, pra të mbyllin çështjen e inceneratorëve, ta bëjnë relative, ta bëjnë të thjeshtë, ta bëjnë sikur s’ka ndodhur asgjë, disa fatura janë vjedhur, janë vjedhur 5 milionë euro fatura fiktive, është një gjë e mirë, është bërë mirë landfillimi e të tjera si këto.
Kryeministri ka dashur të heqë çdo vëmendje nga afera e inceneratorëve pasi një skandal i madh i ka plasur, kontratat koncesionare i kanë dalë korruptive dhe SPAK-u ka drejtuar gishtin edhe tek ish-zëvendëskryeministri Ahmetaj, të cilit i ka hetuar dhe pasurinë.
I ka arrestuar një ish-ministër, dhe dhjetra zyrtarë, gjithashtu për PPP-të apo koncesionet priten arrestime të reja.
Më pas u tentua që të shpallej një kullë si një problematikë e madhe, megjithëse kishte një vit apo më shumë që ishte dhënë leje si gjoja investim i Sali Berishës. Sikur prapa kullës ishte Saliu, pra në 2023, pas 10 viteve në pushtet të Ramës, kullën e investonte Saliu.
Gënjeshtrat e dirigjuara nga sektori propagandistik, për të hequr vëmendjen. U kuptua që skenaristi ishte ish-kreu i PD-së, Lulzim Basha, por edhe me benzinën e hedhur në zjarr nga Erion Veliaj.
Më pas një shpërthim i kontrolluar nga SPAK-u, nga prokurori Edvin Kondili, në lidhje me çështjen e sterilizimit, ku u arrestua një ish-zëvendësministër dhe administratori dhe pronari i shoqërisë koncesionare.
Foto ilustruese
Asnjë veprim ndaj zotit Ilir Beqaj, që në fakt në të gjitha aktet e lexuara nga kërkesa e çuar tek ai nga vetë prokurori Kondili te GJKKO duket qartë se shpërdorimi i detyrës është një vepër penale e kryer në të gjitha rastet, të paktën sipas të dhënave që SPAK-u ka dërguar para gjykatësit. Vetë gjykatësi ka kërkuar të thellohen hetimet për Beqajn dhe ish-ministrin Shkëlqim Cani.
Rama paralajmëron lëvizje në qeveri në heshtje dhe herë pas here përtej lajmeve negative, por ato i duhen si lajme e zhurmë në kohën e duhur.
Korrupsionit dhe aferave kryeministri tenton t’i lejë të rrjedhin dhe ti japë forcë dhe peshë tek lajmet e tij pozitive, siç ishte ai i Shpiragut sot apo kontributin e tij të palodhshëm gjatë kësaj stine vere në lidhje me turizmin në Shqipëri nga Velipoja deri në Ksamil, ku ditë pas dite kryeministri vazhdon të përcjellë lajmet e tij të mira, për zhvillimin e turizmit, për të ardhmen e turizmit dhe qershia mbi tortë ishin disa ditë pushime të kryeministres italiane Meloni në Vlorë.
Ndryshimet në qeveri duket se nuk ia zbehin Ramës lajmet e mira që do të ndajë, megjithëse inceneratorët, sterilizimi, korrupsioni, skandalet, problematikat i qëndrojnë si sëpatë mbi kokë, të gjitha koncesionet që disa prej tyre ndoshta dhe janë në përfundim dhe pritet thjesht dhe vetëm që qeveria të reflektojë, apo të ndërhyjë t’i ndryshojë këto kontrata koncesionare që ka firmosur dhe të shpëtojë nga zullumi i bëmave dhe gjëmave të koncesioneve të cilat po ia prishin çdo “ëmbëlsi dhe mirësi” që kryeministri ynë bën për mëmëdheun./ CNA
