Në fjalën e tij para demokratëve të mbledhur në Korçë, Sali Berisha deklaroi se sipas tij, zhvillimet e fundit ndërkombëtare po konfirmojnë akuzat e opozitës ndaj qeverisë. Ai u ndal tek Akti për Demokracinë dhe Prosperitetin e Ballkanit Perëndimor i Kongresit amerikan, duke theksuar se nga Uashingtoni po vijnë sinjale alarmi për korrupsionin dhe lidhjet e qeverisë me krimin.
“I dëgjoni sirenat e alarmit që bien nga Uashingtoni për korrupsionin e qeverisë së Ramës dhe lidhjen e saj me krimin? Ne triumfuam,” u shpreh Berisha, duke e konsideruar këtë një fitore politike të Partisë Demokratike në arenën ndërkombëtare.
Kreu i PD-së theksoi se opozita ka kaluar periudha shumë të vështira, por ka arritur të mbijetojë dhe të dalë më e fortë. “Ne jo vetëm që nuk u zhdukëm, por mbrojtëm lirinë, dinjitetin dhe kauzën e çdo shqiptari, në kushtet më të vështira, kur bëhej gjithçka kundër nesh,” deklaroi ai.
Sipas Berishës, sot opozita ndodhet në një fazë të re politike, më të qartë dhe më të vendosur. “Sot jemi më të kthjellët dhe më të vendosur se kurrë në histori,” tha ai, duke shtuar se PD ka paraqitur mijëra dokumente para opinionit ndërkombëtar që, sipas tij, faktojnë se Edi Rama është “armik i votës së lirë”.
Berisha akuzoi qeverinë se nuk organizon zgjedhje të lira dhe të ndershme. “Ai nuk zhvillon zgjedhje, por vetëm farsë elektorale, dhe kjo na jep të drejtë të kërkojmë ndëshkimin që meriton,” u shpreh ai.
Ai vijon sulmet edhe ndaj zëvendëskryeministres Belinda Balluku. Berisha e akuzoi atë për pasurim të paligjshëm, duke përmendur pasuri të mëdha që, sipas tij, janë përfituar gjatë qeverisjes. “300 apartamente, dy jahte, 15 supermarkete. Nga një babysitter në Athinë në milionere duke vjedhur taksat e shqiptarëve,” tha Berisha.
Ai shtoi se Rama dhe Balluku “i kanë ditët e numëruara”, duke theksuar se në qeverisjen e PD-së nuk është penguar kurrë drejtësia. “Ne kishim armike prokuroren Ina Rama, por kurrë nuk na shkoi në mendje të mos hiqnim imunitetin e deputetëve,” deklaroi Berisha.
