Kur kandidatët për president të Shteteve të Bashkuara, Donald Trump dhe Joe Biden, të përballen në debatin përfundimtar në televizion, secilit do t’i ndalet mikrofoni kur tjetri është duke u përgjigjur në një pyetje.
Debati 90-minutësh është i ndarë në gjashtë segmente me nga 15 minuta. Secili kandidat do t’i ketë nga dy minuta kohë për të folur pa u penguar para se të kalohet në debat të hapur, shkruan The Guardian, transmeton Gazeta Express.
Komisioni për Debate Presidenciale të hënën njoftoi: “Me qëllim të zbatimit të kësaj mase për të cilën është arritur pajtim, kandidati i vetëm, mikrofoni i të cilit do të jetë i hapur, do të jetë kandidati që e ka fjalën sipas rregullave”.
Zyrtarët e fushatës së presidentit të tanishëm paraqitën ankesa ndaj këtij vendimi, por thanë se Republikanët do të marrin pjesë në debatin e së enjtes mbrëma.
Duke folur para gazetarëve, kreu i Shtëpisë së Bardhë tha se kushtet e debatit janë të padrejta: “Unë do të marr pjesë, por është shumë e padrejtë që të kemi një moderator që është tërësisht i anshëm”.
Ndryshimi i rregullit erdhi pas një debati kaotik që u zhvillua më 30 shtator, gjatë të cilit kandidatët vazhdimisht e penguan njëri-tjetrin, por Donald Trump bëri më shumë ndërhyrje gjatë kohës kur rivali Joe Biden fliste.
