Një skandal ndodhi në Europianin e mundjes që mbahet në Sllovaki. Suksesin e mundësve të Shqipërisë e zbehu një incident.
Gjatë dorëzimit të medaljes zv/presidenti i Federatës Botërore dhe kreu i asaj ruse, Mikhail Mamiashvili ushtroi forcë dhe sipas KOKSH-it e ka quajtur edhe tradhtar.
Kjo solli nervozizëm nga mundësi i lindur në Osetinë e Veriut. Komiteti Olimpik Kombëtar Shqiptar në reagimin e tij shtoi se e ka ankimuar sjelljen e zyrtarit të lartë të Federatës Botërore të Mundjes.
“KOKSH dënon me forcë këtë gjest dhe do të vërë në dijeni të gjitha organizmat Olimpike Botërore, për fyerjen dhe dhunimin e sportistit, gjatë kësaj ceremonie të rëndësishme sportive.
Shqipëria ka humbur plot 37 medalje Olimpike, Botërore dhe Europiane, për sportistë që për arsye të ndryshme kanë garuar për shtete të tjera, por asnjëherë, as Federatat dhe as Komiteti Olimpik, nuk janë prononcuar për të quajtur sportistët ‘tradhtarë’”, njoftoi Komiteti Olimpik Kombëtar Shqiptar.
Chermen Valiev fitoi medaljen e artë ndaj rusit, Zaurbek Sidakov, i cili garon si neutral, pasi Rusia është e përjashtuar për shkak të luftës në Ukrainë.
