Një skandal ka tronditur sistemin penitenciar britanik, pasi një gardiane 23-vjeçare, Isabel Dale, akuzohet se ka pasur marrëdhënie seksuale me të burgosur dhe ka futur drogë brenda ambienteve të burgut “Coldingley” në Surrey.
Sipas hetimeve të prokurorisë britanike, Dale kishte zhvilluar marrëdhënie seksuale me të dënuarin Shahid Sharif në sallën e lutjeve të burgut, ndërsa dy të burgosur të tjerë shërbenin si “roje”. Ngjarja ndodhi më 19 korrik 2022 dhe u dokumentua nga kamerat e sigurisë, ku gardianja shihej duke rregulluar rripin e pantallonave pak pasi kishte dalë nga dhoma.
Dale kishte nisur punën në burg në shtator të vitit 2021 dhe, sipas prokurorëve, mbante marrëdhënie të fshehtë me Sharif për më shumë se një vit. Ky i fundit ishte dënuar me 12 vite burg për grabitje të armatosur dhe më vonë u transferua në burgun “Swaleside” në Kent, pasi lidhja e tyre doli në dritë.
Hetuesit zbuluan se gardianja vazhdonte ta vizitonte Sharifin edhe pas transferimit, i dërgonte mesazhe erotike dhe foto intime, si dhe i kalonte para përmes llogarive bankare. Në telefonin e saj u gjetën komunikime me përmbajtje seksuale dhe fotografi të çiftit.
Për më tepër, hetimet zbuluan se Dale e ndihmonte Sharifin të fuste substanca narkotike në burg përmes zarfeve të lagura me lëndën sintetike “spice”. Ajo përdorte edhe llogarinë e tij në Snapchat për të organizuar shpërndarjen e drogës.
Në banesën e gardianes u gjetën pajisje që dyshohet se përdoreshin për kontrabandë, si dhe një unazë fejese që, sipas saj, i ishte dhuruar nga i burgosuri.
Prokuroria e akuzon gjithashtu 23-vjeçaren se kishte një lidhje të dytë intime me një tjetër të dënuar, Connor Manney, 28 vjeç, i cili po vuan një dënim 9-vjeçar për një aksident fatal ku humbi jetën shoku i tij ndërsa ai po arratisej nga policia me 237 km/orë.
Dale akuzohet për dy raste abuzimi të detyrës publike dhe komplot për futje të substancave të ndaluara në burg. Ajo i ka mohuar të gjitha akuzat, ndërsa gjyqi pritet të zgjasë dy javë.
Ndërkohë, i burgosuri Sharif e ka pranuar fajësinë për përfshirjen në rrjetin e trafikut të drogës brenda burgut.
