Bill Gates është tërhequr nga mbajtja e fjalimit të tij kryesor në një samit të inteligjencës artificiale në Indi të enjten, tha fondacioni i tij, ndërsa miliarderi përballet me shqyrtim të hollësishëm për lidhjet e tij me autorin e krimit seksual Jeffrey Epstein.
“Pas shqyrtimit të kujdesshëm dhe për të siguruar që fokusi të mbetet në prioritetet kryesore të Samitit të inteligjencës artificiale, Z. Gates nuk do ta mbajë fjalimin e tij kryesor,” tha Fondacioni Gates në një deklaratë vetëm disa orë para se ai të fliste.
Nuk u dha asnjë arsye për tërheqjen e papritur. Themeluesi i Microsoft është kritikuar ashpër në javët e fundit për dy email-e të publikuara së fundmi që Epstein duket se ia ka shkruar vetes, në të cilat ai pretendon se i ka lehtësuar takimet seksuale Gates dhe e ka ndihmuar të marrë ilaçe për të fshehur një infeksion seksualisht të transmetueshëm nga gruaja e tij.
Nuk është e qartë se kush i shkroi mesazhet e vitit 2013 të ruajtura në llogarinë e email-it të Epstein, por ato i janë drejtuar vetes nga Epstein.
Gates i ka mohuar fuqimisht këto pretendime si “të rreme”. Miliarderi i teknologjisë do të fliste në Samitin e Ndikimit të IA-së në Nju Delhi, i cilësuar si një nga konferencat më të mëdha të IA-së në Jugun Global. Kryeministri indian Narendra Modi e përuroi samitin të enjten në mëngjes. Gates u pyet më pas për dokumentet e fundit në një intervistë me Nine Neës, degën e CNN në Australi.
“Me sa duket, Jeffrey i shkroi një email vetes. Ai email nuk u dërgua kurrë, emaili është, e dini, i rremë. Kështu që nuk e di se çfarë mendonte ai aty. Më kujton, çdo minutë që kalova me të pendohem dhe, e dini, kërkoj falje që e bëra këtë,” tha Gates.
