Vendet e BE-së miratuan zyrtarisht këtë të enjte paketën e 19-të të sanksioneve kundër Rusisë për luftën e saj kundër Ukrainës, që përfshin edhe ndalimin e importeve të gazit natyror të lëngshëm rus.
Miratimi i paketës nga 27 vendet e BE-së, erdhi pak orë pas heqjes së bllokimit nga Sllovakia.
“Është një paketë e rëndësishme që synon rrjedhat kryesore të të ardhurave ruse përmes masave të reja energjetike, financiare dhe tregtare”, tha presidenca daneze e BE-së.
Ndalimi i LNG-së do të hyjë në fuqi në dy faza: kontratat afatshkurtra do të përfundojnë pas gjashtë muajsh dhe kontratat afatgjata nga 1 janari 2027. Ndalimi i plotë vjen një vit më herët se plani i Komisionit për t’i dhënë fund varësisë së bllokut nga lëndët djegëse fosile ruse.
Masat në paketë përfshijnë gjithashtu një mekanizëm të ri për të kufizuar lëvizjen e diplomatëve rusë brenda BE-së.
“Ai synon bankat ruse, bursat e kriptomonedhave, subjektet në Indi dhe Kinë, ndër të tjera. BE-ja po frenon lëvizjet e diplomatëve rusë për të kundërshtuar përpjekjet e destabilizimit. Është gjithnjë e më e vështirë për Putinin të financojë këtë luftë”, tha shefja e politikës së jashtme të BE-së, Kaja Kallas, në një postim në X.
Ministri i Jashtëm danez Lars Løkke Rasmussen tha se ndalimi i importit të LNG-së është një hap i rëndësishëm drejt një heqjeje të plotë graduale të energjisë ruse në BE.
