Përballja me koronavirusin dhe kujdesi për babanë e hospitalizuar, në fund të qershorit të vitit të kaluar, bënë që Arta Jashari t’ia mësyjë një misioni humanitar.
Shembulli i sopranos kosovare së fundmi ka marrë vëmendjen edhe të mediave ndërkombëtare. Siç shkruan “Associated Press”, Jashari edhe pas shërimit të babait të saj, dirigjentit Baki Jashari, vazhdoi ta ndihmonte stafin mjekësor në trajtimin e pacientëve me koronavirus.
Sipas AP-së, ajo nuk ka ndonjë trajnim në fushën e mjekësisë, porse ka asistuar për të ndihmuar pacientët në nevojë, qoftë në klinikë, ose edhe në shtëpi.
Rrëfimi për të u shpërnda edhe në shumë media të tjera ndërkombëtare, ndër to edhe nga “Washington Post” me titullin: “Në Kosovë virusi vë në pah shkëlqimin e humanizmit”.
Përmendja e Kosovës si shembull i tillë e bën Arta Jasharin të krenohet.
“Kur e pashë se në cilat media kishte dalë emri i Kosovës me një shembull të vënë se ne si popull, siç e kam thënë, jemi shembull dhe e kemi humanitetin të trashëguar dhe kjo si vlerë është dalluar edhe nga mediat botërore dhe jam shumë krenare që ka arritur përmes stories sime që të pasqyrohet Kosova në një nivel të tillë”, ka thënë ajo.
Associated Press fokusohet edhe në dimensionin artistik të saj. Tregon sesi në mbrëmje Jashari i heq veshjen dhe maskën mbrojtëse ndaj virusit dhe bëhet gati të performojë bashkë me Filharmoninë e Kosovës.
Ajo insiston që puna vullnetare në spital dhe performimi para audiencës kanë më shumë të përbashkëta sesa mund të imagjinohet.
Të dyja, thotë ajo, “japin shumë shpresë dhe emocione”.
