Ambasadori i Delegacionit të Bashkimit Europian, Luigi Soreca vlerësoi sot dekretimin e 4 anëtarëve të rinj të Gjykatës së Lartë, nga Presidenti Ilir Meta.
Soreca theksoi se, “tani është e rëndësishme që të procedohet me shpejtësi me emërimet e mëtejshme në Gjykatë”.
Ambasadori siguroi se “BE do të vazhdojë të ofrojë mbështetje të plotë për KLGJ-në për të arritur këtë objektiv”.
“Mirëpresim dekretimet e Presidentit Ilir Meta për 4 emrat e rinj të Gjykatës së Lartë, pas propozimit të KLGJ-së. Tani është e rëndësishme që të procedohet me shpejtësi me emërimet e mëtejshme në Gjykatë. BE do të vazhdojë të ofrojë mbështetje të plotë për KLGJ-në për të arritur këtë objektiv”, tha Soreca.
Presidenti Meta vendosi që Sokol Binaj të emërohet gjyqtar i Gjykatës së Lartë, Albana Boksi të emërohet gjyqtare e Gjykatës së Lartë, Sandër Simoni të emërohet gjyqtar i Gjykatës së Lartë dhe Klodian Kurushi të emërohet gjyqtar i Gjykatës së Lartë.
Së bashku me këto 4 emërime të reja, Gjykata e Lartë nga sot bëhet me 7 anëtarë, nga 19 anëtarë, që duhet të ketë, sipas vendimmarrjes së KLGJ-së.
