Në Mal të Zi, sot pritet të shembet edhe një tullë e asaj që quhet pushtet. Pas shkarkimit të kryeministrit Zdravko Krivokapiq, Kuvendi i Malit të Zi do të mblidhet sot në seancë të jashtëzakonshme ku do të votohet për shkarkimin ose jo të kryetarit të këtij institucionit, Aleksa Beçiq, ka njoftuar gazeta “Vijesti” të hënën.
Kërkesa për këtë është ndërmarrë nga partia opozitare, ajo e presidentit Milo Gjukanoviq, DPS. Dhe në rast, se kërkesa mbështetet edhe nga Lëvizja qytetare URA, që udhëhiqet nga zv.kryeministri Dritan Abazoviq, atëherë Beçiq do të shkarkohet.
Opozita ka 38 vota, ndërkohë që për shkarkim duhen 41. URA ka 4 deputetë, kështu që nëse i bashkohet DPS-së sikurse për shkarkimin e Zdravkoviqit, atëherë edhe Beçiq do të rrëzohet.
Në fakt, koalicioni qeveritar në Mal të Zi, ishte jostabil që nga formimi i tij.
Abazoviqi si nënkryetar i Qeverisë ka propozuar një qeveri të pakicës si dalje nga kjo krizë, por dy partnerët e koalicionit, parti proserbe, e kanë akuzuar atë se kështu “po shkel vullnetin qytetar” dhe se “po e kthen Gjukanoviqin në pushtet”.
Në rast se Beçiqi sot do të shkarkohet, atëherë hapet rrugë për një kryetar të ri të Kuvendit dhe për një qeveri të re të kryesuar nga Abazoviqi.
