Rrugët dhe sheshet e vendit paraditen e sotme ishin të dedikuara vetëm për lëvizjen e nënave me fëmijë deri në 10 vjeç.
Në kushtet e kufizimit të lëvizjes që ka nisur prej së premtes, ditën e sotme u lejua lëvizja e nënave me fëmijë brenda fashës së përcaktuar orare.
Në rrugët e kryeqytetit dhe qyteteve të tjera të vendit sot deri në orën 11:00 ishte e lejueshme lëvizja për këtë kategori, ndërkohë që ditën e djeshme të njëjtën fashë orare e kishin në dispozicion të moshuarit.
Kryeministri Edi Rama publikoi sot një video nga rrugët dhe sheshet kryesore të kryeqytetit të mbushura me nënat dhe fëmijët, që shijuan rrezet e diellit.
Por, ndërkohë në urdhrin që lejonte lëvizjen e tyre kërkohet po ashtu zbatimi i disa masave, si përshembull nënat duhet të mos shoqërohen me shoqe dhe fëmijët duhet të mbahen larg çdo kontakti me fëmijë të tjerë./ATSH/
