Kryetari i bashkisë së Tiranës, Erion Veliaj është përballur edhe me herët lidhur me denoncimet e PD-së për dosjen “5D”. Rreth 1 vit më parë kryebashkiaku në studion e emisionit “Opinion” i ka konsideruar shpifje të gjitha akuzat e ngritura ndaj tre drejtorëve të bashkisë të cilët sot janë pas hekurave.
“Kjo është e gjitha një shpifje dhe po ju them, koha ku gjykata bëhej nëpër studio, koha kur verdikti jepej nëpër studio, koha kur prokuroria apo SPAK punonte nëpër studio ka mbaruar. Për sa kohë unë vetë shkoj në prokurori për të gjitha akuzat apo çështjet, do të thotë që inkurajoj të gjithë të njëjtën gjë.“, shprehej Veliaj asokohe.
SPAK e akuzon Redian Mollën së bashku me zyrtarë të tjerë të bashkisë se favorizuan kompaninë 5D Konstruksion në tendera punësh publike. Kompania është regjistruar në pronësinë e Nestor Muhametllarit, por prokuroria pretendon se ka de fakto zotërues Mollën dhe drejtorin tjetër të Bashkisë së Tiranës, Mariglen Qato. Kompania 5D Konstruksion u themelua në vitin 2016 me emrin “Igor Elektrik” dhe e ndryshoi më pas emrin në vitin 2019 në V.A.S. Konstruksion dhe në vitin 2021 në 5D Konstruksion. Të dhënat e bilanceve të kompanisë të depozituara në Qendrën Kombëtare të Biznesit, tregojnë se të ardhurat e saj ishin në masën 2.2 miliardë lekë [rreth 20 milionë euro] për periudhën nga viti 2016 kur u themelua deri në vitin 2022. Nga të dhënat e prokurimeve publike, kompania ka fituar 29 kontrata me vlerë të përgjithshme prej 1.8 miliardë lekësh.
Sipas SPAK hetimet për Mollën dhe personat e tjerë të akuzuar në këtë dosje kanë filluar kryesisht në prill të vitit 2023, ndërsa më pas atyre u është bashkëlidhur edhe një kallëzim penal nga kandidati i opozitës për kryetar i Bashkisë së Tiranës në zgjedhjet vendore të vitit të kaluar, Belind Këlliçi. Sipas SPAK, Qato dhe Molla e kishin fshehur pronësinë mbi kompaninë 5D Konstruksion përmes ortakëve fiktivë në aktet e regjistrimit. Molla i ka mohuar akuzat në një qëndrim publik duke pretenduar se nuk kishte lidhje me kompaninë dhe se akuzat ishin sulm politik.
