Prokuroria e Posaçme ka dhënë detaje mbi kontrollin e ushtruar sot në banesat e ish-ministrit Arben Ahmetaj.
Pas autorizimit të dhënë nga Kuvendi, SPAK dhe BKH kanë mësyrë sot në 7 prona të Ahmetajt dhe të afërmve të tij. Bëhet me dije se gjatë kontrolleve janë gjetur dokumente, celularë, USB dhe materiale të tjera që i shërbejnë hetimit
Po ashtu SPAK bën me dije se i janë bllokuar ish-ministrit 6 prona, nga të cilët 4 apartamente. Po ashtu është bërë bllokimi i 2 llogarive bankare me vlerë 124 300 euro.
Ahmetaj hetohet për korrupsion, fshehje pasurie e pastrim parash. SPAK fillimisht kërkoi heqjen e imunitetit dhe pasi Kuvendi e aprovoi, ka vijuar me kontrollin e banesës. Po ashtu SPAK ka kërkuar arrestimin e Ahmetajt, i cili ndodhet jashtë vendit. Madje sot për sekuestrimin që bëri SPAK, pati një reagim nga ana e tij, ku shprehej se sot u bë reprezalja e radhës në familjen e tij.
Reagimi i SPAK
Prokuroria e Posaçme Kundër Korrupsionit dhe Krimit të Organizuar dhe Byroja Kombëtare e Hetimit në bashkëpunim me Drejtorinë e Përgjithshme të Policisë së Shtetit, në kuadrin e hetimit të procedimit penal nr. 277/1 të vitit 2022, të regjistruar për veprat penale të “Shpërdorimit të detyrës”, “Korrupsionit pasiv të funksionarëve të lartë shtetërore ose të zgjedhurve vendorë”, “Korrupsionit aktiv të funksionarëve të lartë shtetërore ose të zgjedhurve vendorë”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim” dhe “Pastrimi i produkteve të veprës penale ose veprimtarisë kriminale”, parashikuar respektivisht nga nenet 248, 260, 245, 257/a dhe 287 i K.Penal (procedim penal i regjistruar ndër të tjerë edhe në ngarkim të personit nën hetim Arben Ahmetaj), sot, më datë 18.07.2023 ka proceduar me kryerjen e kontrolleve dhe sekuestrove si më poshtë:
Në zbatim të vendimeve të Gjykatës së Posaçme të Shkallës së Parë Për Korrupsionin dhe Krimin e Organizuar Tiranë me nr.295 akti datë 16.07.2023 dhe nr.297 akti datë 17.07.2023 ka ushtruar kontroll në 7 (shtatë) banesa. Gjatë kontrollit janë gjetur dhe sekuestruar dokumente me interes për hetimin si dhe kompjuter lap – top, telefona celularë, USB etj të cilët do ti nënshtrohen verifikimeve të mëtejshme.
