Koreja e Veriut shënoi me një sërë ceremonish madhështore 80-vjetorin e themelimit të Partisë së Punëtorëve në pushtet, duke shfaqur forcën, besnikërinë dhe kontrollin e regjimit ndaj popullatës. Festimet kulmuan me një shfaqje masive gjimnastike dhe artistike në Stadiumin e Ditës së Majit në Pjongjang.
Performanca, e njohur për përmasat e saj gjigante, përfshiu mijëra gjimnastë, fëmijë dhe performues, të cilët realizuan koreografi të sinkronizuara në mënyrë perfekte. Pamjet e ofruara nga Agjencia Qendrore Koreane e Lajmeve (KCNA) treguan performuesit duke kthyer karta për të formuar imazhe gjigante dhe slogane politike në tribuna, një praktikë tipike e festivaleve propagandistike të vendit.
Në ceremoninë kryesore, ku u shfaq në publik edhe udhëheqësi i Koresë së Veriut, Kim Jong Un, u theksua sërish besnikëria totale ndaj regjimit. Vetëm dy ditë më parë, në Stadiumin Kim Il Sung u mbajt edhe një takim zyrtar për “paraqitjen e letrave të besnikërisë” ndaj Kim Jong Un, duke nënvizuar rolin qendror të tij si trashëgimtar i ideologjisë së Partisë.
Festimet e 80-vjetorit shërbejnë si një demonstrim i fuqisë së brendshme dhe unitetit ideologjik të Koresë së Veriut, duke përçuar mesazhin e stabilitetit, pavarësisht sfidave ekonomike dhe izolimit ndërkombëtar.
Theksohet se, si zakonisht, gazetarëve të pavarur nuk iu dha qasje për të mbuluar drejtpërdrejt ngjarjet, dhe fotot e Udhëheqësit Suprem u shpërndanë nga agjencia shtetërore e lajmeve KCNA.
