Kryeministri britanik, Keir Starmer, po përpiqet të rikthejë kontrollin mbi Partinë Laburiste pas pranimit të dorëheqjes së këshilltarit më të afërt, Morgan McSweeney, në kulmin e zemërimit për emërimin e Peter Mandelsonit si ambasador në Shtetet e Bashkuara të Amerikës, ka raportuar të hënën (09.02.2026) gazeta “Guardian”.
Pas disa ditësh me presion për shkak të skandalit, largimin i tij nga posti i shefit të stafit – duke marrë “përgjegjësi të plotë” për këshillat e tij që Mandelsonin ta emëronte ambasador në Uashington pavarësisht lidhjeve të tij të vazhdueshme me Jeffrey Epsteinin – McSweeney e ka pranuar se vendimi kishte minuar besimin në mesin e laburistëve dhe në vetë politikën.
Aleatët e Starmerit shpresojnë se largimi i njërit prej këshilltarëve më të fuqishëm dhe më vendimtarë laburistë në historinë e re politike do të ndihmojë që të ulen gjakrat në mesin e deputetëve laburistë lidhur me lidershipin e tyre – dhe që të vazhdojnë t’i mbajnë larg tyre sfiduesit e mundshëm. Por largimi i njeriut që dikur mendohej arkitekti i ngritjes së Starmerit në pushtet është një goditje e madhe. Tani fokusi është kthyer edhe njëherë te vendimi që kishte marrë kryeministri për emërimin e Mandelsonit.
Burime të larta në mesin e laburistëve kanë thënë se largimi i McSweeneyt e ka ekspozuar rrezikshëm kryeministrin në kohën kur po shkohet drejt një serie sfidash elektorale dhe politike që do të mund të përcaktonin fatin e tij politik.
Një burim i afërt me Downing Streetin ka thënë: “Keir porsa ka mbetur pa murin e tij të zjarrtë, për Mandelsonin dhe një numër çështjesh të tjera”
Një deputet ka thënë se dorëheqja e fundit i jep pak kohë kryeministrit, porse vazhdon të jetë i sfiduar, duke shprehur bindjen se është çështje kohës largimi i Starmerit.
Figura të larta qeveritare kanë thënë se presioni do të rritet ndaj Starmerit me publikimin e pritshëm të qindra e mija dokumenteve, përfshirë mesazhet private në WhatsApp dhe letrat elektronike ndërmjet Mandelsonit, zyrtarëve të Numrit 10 dhe ministrave gjatë kohës sa ishte ambasador në SHBA.
