Duke folur në një ngjarje të organizuar nga Fondi Gjerman Marshall të enjten, Sekretari i Përgjithshëm Jens Stoltenberg ndau pesë mësime kyçe për suksesin e vazhdueshëm të NATO-s pas një dekade vendimtare në krye të NATO-s.
Si pjesë e fjalimit të tij të lamtumirës, Stoltenberg nënvizoi rëndësinë e vazhdimit të rritjes së shpenzimeve të mbrojtjes dhe sigurimit të marrëdhënieve të forta ekonomike midis aleatëve. Ai theksoi mbështetjen e palëkundur të NATO-s për Ukrainën dhe se sa vendimtare do të jetë kjo në ndihmën për t’i dhënë fund luftës së Rusisë. Duke reflektuar mbi përvojën e NATO-s në Afganistan, Sekretari i Përgjithshëm nënvizoi gjithashtu nevojën për të përcaktuar qartë objektivat e çdo operacioni të ardhshëm ushtarak përtej kufijve të NATO-s.
Stoltenberg përfundoi fjalimin e tij duke theksuar rëndësinë e lidhjes transatlantike midis Evropës dhe Amerikës së Veriut, duke theksuar se “investimi në marrëdhëniet transatlantike është e vetmja rrugë fituese përpara”.
“Evropianët duhet të kuptojnë pa NATO-n, nuk ka siguri në Evropë. 80 për qind e shpenzimeve të mbrojtjes së NATO-s vijnë nga aleatët jo-BE. Dhe nuk ka të bëjë vetëm me burimet. Bëhet fjalë edhe për gjeografinë. Pa Turqinë në Jug, Norvegjinë në Veri dhe SHBA, Kanada dhe Mbretërinë e Bashkuar në Perëndim, është e pamundur të parashikohet siguria e kontinentit evropian”, ka thënë ai.
Shefi i Përgjithshëm i NATO-s ka thënë se për një dekadë shpenzimet në të gjithë aleancën janë rritur ndjeshëm dhe se tashmë objektivi për ndarje të 2 për qind të Bruto Produktit Vendor (GTP) në mbrojtje nuk është i mjaftueshëm.
“Të gjithë aleatët e NATO-s tani investojnë të paktën 2% të PBB-së në mbrojtje ose kanë plane për të arritur atje së shpejti. Dhe për herë të parë, shpenzimet totale të mbrojtjes në Evropë dhe Kanada janë mbi objektivin prej 2%. Pra, lajmi i mirë është se ne kemi përmbushur zotimin që kemi bërë dhjetë vjet më parë. Por lajmi i keq është se kjo nuk mjafton më. Kjo është arsyeja pse aleatët e NATO-s kanë rënë dakord të shpenzojnë të paktën dy për qind të PBB-së për mbrojtjen. Për të përmbushur këto objektiva të dakorduara, aleatët do të duhet të shpenzojnë dukshëm më shumë se dy për qind të PBB-së për mbrojtjen në vitet në vijim”, ka thënë ai.
Stoltenberg gjithashtu ka shtuar se nuk mund të ketë siguri të qëndrueshme në Evropë, pa një Ukrainë të qëndrueshme.
“Nuk mund të ketë siguri të qëndrueshme në Evropë, pa një Ukrainë të qëndrueshme. Dhe nuk ka siguri të qëndrueshme për Ukrainën, pa anëtarësimin në NATO. Dera e NATO-s është e hapur. Ukraina do të bashkohet”, është shprehur ai.
