Suedia ka ndaluar testimet e shkallës së gjerë për COVID-19, madje edhe te personat që shfaqin simptoma të infeksionit, duke i dhënë kështu fund vendosjes së tendave nëpër qendra qytetit, testimeve nëpër vetura apo edhe testeve të dorëzuara në shtëpi gjatë pandemisë, që kishin ofruar të dhëna esenciale për gjurmim, raporton agjencia AP.
Kjo lëvizje e vë Suedinë në kundërshtim me pjesën më të madhe të Evropës, por disa ekspertë thonë se mund të bëhet normë, pasi testimi i kushtueshëm sjell më pak përfitime me variantin Omicron që është lehtësisht i transmetueshëm por më i butë. Qeveritë po fillojnë të shqyrtojnë trajtimin e COVID-19 si sëmundje tjetër endemike.
“Ne kemi arritur në një pikë ku kostoja dhe rëndësia e testimit më nuk janë të justifikueshme”, ka thënë Karin Tegmark Wisell, kryetare e Agjencinë për Shëndetin Publik në Suedi. “Nëse duam të kemi testim të gjerë të adoptuar për të gjithë që kanë COVID-19, kjo do të nënkuptonte 55 milionë dollarë në javë apo 220 milionë dollarë në muaj”.
Duke filluar nga e mërkura, vetëm punonjësit shëndetësorë dhe punonjësit në shtëpitë e pleqve, si dhe personat që gjenden në kategorinë e rrezikuar nga COVID, do të jenë në dispozicion për teste PCR falas nëse shfaqin simptome. Pjesës tjetër të popullatës do t’i kërkohet të qëndrojë në shtëpi nëse shfaqë simptome të COVID.
Testet antigjene janë në dispozicion për blerje në supermarkete e barnatore, por ato rezultate nuk raportohen nga autoritetet shëndetësore. Klinikat private mund të ofrojnë teste dhe certifikata për udhëtim ndërkombëtar, por kostoja nuk do të rimbursohet nga shteti apo sigurimet shëndetësore.
Numri i lartë i të vaksinuarve në Suedi po krijon një optimizëm mesin e zyrtarëve shëndetësorë dhe një studim i vitit 2020 i publikuar të martën ka shfaqur antitrupa te 85 për qind të mostrave.
