Kryeministri i Kosovës, Albin Kurti, shprehet optimist për vizitën e të dërguarit të Bashkimit Europian për dialogun, Miroslav Lajçak. I pyetur nga mediat, shefi i qeverisë tregoi dhe pritshmëritë e tij për bisedën me ndërmjetësuesin lidhur me përgatitjet për takimin e radhës me presidentin e Serbisë, Aleksandër Vuçiç, për propozimin europian për normalizimin e marrëdhënieve.
“Pritjet tona janë që do të vazhdojnë përgatitjet për takimin e datës 18 mars në Maqedoninë e Veriut në Ohër dhe të shohim se si do të mund të ja bashkangjesim përkufizimin të dakorduar europian dhe një plan të mirëfilltë zbatimi që duhet të karakterizohet nga gjithpërfshirja dhe nga efikasiteti,” u shpreh Kurti.
Kurti përsëriti gatishmërinë e tij për ta firmosur propozimin europian, duke shprehur keqardhje që diçka e tillë nuk ndodhi në takimin e 27 shkurtit.
“Unë isha i gatshëm për të nënshkruar kur isha në Bruksel, andaj për marrëveshje duhen dy palë dhe nuk mjafton vetëm njëra. Është dëm që teksti i dakorduar me pesë fjali në preambul dhe 11 nene gjithsej tashmë nuk është nënshkruar me datën 27 shkurt. Dhe pse nuk ka nënshkrime, përgjigjjen duhet ta kërkoni tek të tjerët.”
Megjithatë, më herët, zëdhënësi i BE-së, Peter Stano, konfirmoi se firma nuk konsiderohet e domosdoshme nga Brukseli, teksa këshilloi palët që të fokusohen në modalitetet e zbatimit të propozimit për normalizim të marrëdhënieve.
Përpara takimit të 18 marsit në Ohër, ndërmjetësuesi Lajçak viziton Prishtinën dhe Beogradin, për të përgatitur tryezën e radhës Kurti-Vuçiç.
