Takimi i radhës në kuadër të dialogut Kosovë-Serbi do të mbahet në Bruksel gjatë shtatorit, është bërë e ditur të enjten nga Brukseli.
I dërguari i posaçëm i BE-së për dialog, ish-ministri i Jashtëm sllovak Miroslav Lajçak po ashtu ka dhënë detaje të takimit të së enjtes midis kryeministrit të Kosovës, Avdullah Hoti dhe presidentit të Serbisë, Aleksandar Vuçiq.
Ai përmes një njoftimi pas takimit ka treguar se çështja e parë për të cilën është biseduar sot është ajo e të pagjeturve.
“Rreth kësaj, është kjo çështje tejet e rëndësishme në kontekstin e pajtimit dhe me rëndësi për familjet që jetojnë në amulli tash e sa dekada”, ka thënë ai, duke nxitur bashkëpunim me Komitetin Ndërkombëtar të Kryqit të Kuq.
Sa i përket çështjes së dytë të diskutuar, asaj të bashkëpunimit ekonomik, Lajçak ka thënë se ajo paraqet një prej shtyllave të Bashkimit Evropian.
“Jam i kënaqur se pas takimit të sotëm, të dy liderët u pajtuan që ta vazhdojnë punën intensive në nivel ekspertësh qysh gjatë javës së ardhshme”, ka bërë të ditur ai.
