Ashtu si në takimin e Brukselit, edhe në Ohër do të shkojë me një stilolaps në xhep, gati për të firmosur propozimin europian. Kryeministri i Kosovës, Albin Kurti, u shpreh optimist për normalizimin e marrëdhënieve me fqinjin verior, teksa tregoi se ngërçi aktual për të ecur përpara qëndron tek presidenti serb, Aleksandër Vuçiç.
“Në takimin trilateral në Bruksel u shpreha i gatshëm të nënshkruaj marrëveshjen bazë në emër të Republikës së Kosovës. Fatkeqësisht presidenti i Serbisë, Aleksandar Vuçiç, refuzoi. Këtë refuzim, ai e bëri publik pasi doli nga takimi. Javën e ardhshme ne përsëri do të takohemi në Ohër të Maqedonisë së Veriut. Unë shpresoj që refuzimi i Serbisë që ta nënshkruaj propozimin në Bruksel nuk është tregues që ata nuk pajtohen me përmbajtjen”, tha Kurti.
Duke folur në edicionin e 11-të të Forumit të Mannheim-it, Kurti shtoi se beson që marrëveshja bazë mes Kosovës dhe Serbisë përbën avancim drejt njohjes reciproke. Por Serbia kushtëzon pranimin e propozimit europian me formimin e asociacionit të komunave me shumicë serbe në Kosovë.
“Do të shkoj në Ohër dhe do t’u them të njëjtën gjë që po ju them dhe ju këtu. Dikush duhet të ma shpjegojë se çfarë kuptimi ka kjo, përse më ftoni në një dasmë ku nusja dhe dhëndri nuk duken askund, nuk po e kuptoj qëllimin, pra është diçka që nuk ka kuptim. Po më shqetëson fakti që shoh që të gjithë heshtin dhe askush nuk do të reagojë. Ndoshta ne serbët do të jemi sërish fajtor për diçka”, u shpreh Vuçiç.
Lidhur me përmbajtjen e propozimit europian për normalizimin e marrëdhënieve mes Prishtinës dhe Beogradit foli edhe kryeministrja serbe, Ana Bërnabiç, e cila tha se edhe po t’I vendosnin sanksione Rusisë, teksti do të ishte po i njëjti.
