Ambasadori i Shteteve të Bashkuara në Kosovë, Jeff Hovenier në një reagim për mediat ka zbuluar detaje në lidhje me takimin që u mbajtën në lidhje me asociacionin ku ishin të pranishëm përfaqësues të Presidencës, Kryeministrisë, partive politike dhe shoqërisë civile.
Shefi i diplomacisë amerikane shprehu edhe njëherë angazhimin e qeverisë amerikane se nuk do të lejojë krijimin e një Bosnje të dytë në Kosovë.
“Nuk mbështet asnjë marrëveshje që shkel Kushtetutën e Kosovës ose që kërcënon sovranitetin, pavarësinë dhe karakterin multietnik të saj. Ne kundërshtojmë rreptësishtë krijimin e një entiteti që i ngjan Republikës Sërpska në Bosnje dhe Hercegovinë”, tha Hovenier.
Më tej, ambasadori amerikan shtoi se Shtetet e Bashkuara presin nga Kosova që të përmbushin marrëveshjet e arritura në kuadër të dialogut në Bruksel, pjesë e të cilave është edhe asociacioni, duke ofruar dhe mbështetje.
“Ne kërkojmë nga Qeveria e Kosovës që ta ofrojë vizionin e saj për Asociacionin, që beson se mbron të ardhmen e Kosovës si shtet sovran, i pavarur, multietnik, demokratik, dhe siguron të drejtat e pakicave në përputhje me marrëveshjet e Brukselit dhe Kushtetutën e Kosovës. Ne jemi të gatshëm të ofrojmë ekspertizë dhe mbështetje politike, për t’u siguruar se ai funksionon në interes të të gjithë kosovarëve”, shtoi Hovenier.
Qeveria e Kosovës, e udhëhequr nga Albin Kurti, e kundërshton Asociacionin e komunave me shumicë serbe, duke thënë se nuk mund të lejojë krijimin e një strukture njëetnike me kompetenca ekzekutive.
Idenë e formimit të tij e kanë kundërshtuar edhe qeveritë e kaluara, duke e konsideruar si një mekanizëm që mund t’i sjellë telashe Kosovës, pasi do të kishte qasje të plotë në fushat e zhvillimit ekonomik, arsimit, shëndetësisë, planifikimit urban dhe rural.
