Ajo që ndodhi të Premten në Shtëpinë e Bardhë është padiskutim një moment kyç për politikën globale. Marrëdhënia së fundmi e ‘koklavitur’ mes Presidentit ukrainas Volodymyr Zelensky dhe atij të Shteteve të Bashkuara Donald Trump tanimë ka marrë nuanca dramatike. Ngritje tonesh, kritikë dhe paralajmërime në takimin e djeshëm në Washington, ku prezent ishte edhe JD Vance.
Deklaratat e mëhershme të Trump ndaj homologut të tij prekën “kulmin” në Zyrën Ovale, ku tashmë vihet në diskutim jo vetëm raporti Ukrainë-SHBA, por edhe SHBA-Europë.
Pa vonesë, shumë liderë europianë shprehën hapur mbështetjen e tyre ndaj Zelenskyt, gjë që përforcon bindjen se ky takim është vetëm pikënisja e një krize mes BE-së, NATO-s dhe Shteteve të Bashkuara.
A do të ketë Trump të njëjtin “përkushtim” ndaj çështjes së luftës, apo bisedimet e nisura në Arabinë Saudite do mbeten aty, pa asnjë lloj hapi më tej?! Ka shumë dyshime, për aq kohë sa në deklaratat e tij, Trump ka theksuar se kërkon të forcojë marrëdhënien me Presidentin rus Vladimir Putin.
“Ai më respekton mua!”, i tha Keu i Shtëpisë së Bardhë Zelenskyt, duke e paralajmëruar se nëse nuk pranon kushtet, atëherë do e ketë të gjithë situatën vetë në dorë.
Siguria në Ukrainë po shkon drejt një momenti të dytë kritik dhe për këtë janë tejet të shqetësuar edhe europianët. Nuk është problemi vetëm te dështimi i marrëveshjes për mineralet e rralla, por edhe te skepticizmi që Zelensky ka ndaj Putinit, i cili sipas tij nuk pyet për rregulla apo kontrata. Prandaj, ai kërkoi garanci nga amerikanët.
Ka dy “skenarë” për mënyrën si mund të vijojë e gjitha, së pari Zelensky t’i bindet Trumpit dhe ta përcaktojë si “observatorin e tij politik”, ose të startojë një krizë globale politike ku ende nuk është e qartë se kush do mbajë anën e kujt. Aktualisht, nuk ka lëshime nga ana e Zelenskyt. Në një reagim të fundit, ai nuk ka shprehur aspak pendesë për retorikën e tij ndaj Trump, por ka ritheksuar mirënjohjen për mbështetjen amerikane që prej nisjes së luftës.
“E respektoj Presidentin dhe popullin amerikan. Mendoj se duhet të jemi shumë të hapur dhe shumë të sinqertë. Nuk jam i sigurt që të kemi bërë diçka të keqe. Thjesht dua të jem i sinqertë dhe dua që partnerët tanë ta kuptojnë saktë situatën”, është shprehur Zelensky.
