Talibanët kanë thënë se dy zyrtarë të lartë të Kirgizisë kanë udhëtuar në Kabul për bisedime me udhëheqësit e grupit. Ky është delegacioni më i lartë që po takohet me talibanët që nga ardhja e tyre në pushtet në Afganistan muajin e kaluar.
Ushtruesi i detyrës së ministrit të Jashtëm të Afganistanit, Amir Khan Muttaqi, u takua me nënkryetarin e Këshillit të Sigurisë së Kirgizisë, Taalatbek Masadykov, dhe me shefin e Departamentit për Politikë të Jashtme, Jeenbek Kulubaev, tha zëdhënësi i talibanëve, Zabihullah Mujahid.
Muttaqi “i mirëpriti ata dhe i falënderoi për asistencën. Ai gjithashtu e theksoi nevojën për bashkëpunim dhe asistenca të vazhdueshme”, shkroi Mujahid, duke shtuar se theksi i takimit ishin raportet dypalëshe dhe bashkëpunimi i vazhdueshëm.
Ky takim ndodh në kohën kur komuniteti ndërkombëtar përballet me dilemën nëse duhet t’i njohë talibanët si udhëheqës legjitimë të Afganistanit pas ardhjes së tyre në pushtet, shkruan Free Europe.
Fuqitë botërore kanë krijuar kanale komunikimi me talibanët, por kanë bërë të qartë se kjo nuk nënkupton njohje, që do t’ua mundësonte talibanëve përfaqësimin në organizata ndërkombëtare dhe do t’i zhbllokonte fondet e ngrira. Afganistani po përballet me krizë ekonomike dhe katastrofë humanitare.
