Administrata e Presidentit Trump i kërkoi Gjykatës Supreme të SHBA-së një vendim të shpejtë për të mbajtur në fuqi tarifat që kanë tronditur tregjet globale.
Kërkesa vjen pas një vendimi të Gjykatës së Apelit e cila konstatoi se Trump tejkaloi autoritetin e tij duke shfrytëzuar fuqitë ekonomike emergjente për të vendosur tarifat globale.
Megjithatë, gjyqtarët lejuan që taksat të qëndronin në fuqi deri në mes të tetorit, duke i dhënë kohë Trumpit për ta çuar çështjen në Gjykatën e Lartë.
Që kur u rikthye në presidencë, presidenti amerikan ka përdorur Aktin Ndërkombëtar të Fuqive Ekonomike të Emergjencës për të vendosur tarifa “reciproke” për pothuajse të gjithë partnerët tregtarë të Shteteve të Bashkuara, me një nivel bazë prej 10 përqind dhe norma më të larta për dhjetëra ekonomi, përfshirë Bashkimin Evropian dhe Japoninë.
Prokurori i Përgjithshëm John Sauer, u ka kërkuar gjykatësve që ta trajtojnë çështjen dhe të dëgjojnë argumentet e palëve në fillim të nëntorit.
“Vendimi i Apelit hedh një hije pasigurie mbi negociatat me shtetet e huaja që presidenti ka ndjekur përmes tarifave gjatë pesë muajve të fundit, duke rrezikuar si marrëveshjet kornizë tashmë të arritura, ashtu edhe negociatat që janë në zhvillim e sipër”- tha ai duke shtuar se rreziku në këtë rast është shumë i madh.
Disa padi ligjore janë ngritur kundër tarifave dhe nëse ato përfundimisht shpallen të paligjshme, kompanitë mund të kërkojnë rimbursime.
Më herët, Trump tha se nëse hiqen tarifat, SHBA mund të përfundojë duke u bërë një vend i botës së tretë. Ndërsa Sekretari i Thesarit Scott Bessent paralajmëroi se vendimi i gjykatës së apelit minonte rëndë aftësinë e Presidentit për bisedime me partnerët ndërkombëtarë.
“Liderët botërorë po vënë në pikëpyetje autoritetin e Presidentit duke shmangur negociatat ose shtyrë ato” tha Bessent.
