Më 23 janar shënohet Dita Botërore e Shkrimit të Dorës. Kjo është një datë simbolike që synon të rikthejë vëmendjen te një prej gjesteve më të lashta dhe thelbësore, i cili në botën moderne po zëvendësohet gjithnjë e më shumë nga tastierat dhe ekranet digjitale. Një praktikë që për shekuj ka qenë e natyrshme dhe e përditshme, por që sot po humbet terren, mbi të gjitha te brezat e rinj.
Sipas ekspertëve, shkrimi me dorë nuk është thjesht një zakon i së shkuarës, apo një mënyrë për të transmetuar dijen dhe ngjarjet historike. Ai është në fakt një aktivitet me ndikim të drejtpërdrejtë në funksionimin e trurit, të mësuarit dhe zhvillimin e gjuhës. Studime të shumta tregojnë se shkrimi me laps dhe letër aktivizon më shumë zona të trurit, ndihmon përqendrimin, rrit kreativitetin dhe përmirëson aftësinë për të memorizuar informacionet.
Në një realitet të dominuar nga teknologjia dhe ritme të shpejta vizuale, shkrimi manual ndihmon në fokusimin e mendimit dhe redukton lodhjen digjitale. “Shkrimi me dorë është një aktivitet që stimulon zhvillimin mendor dhe përmirëson kontrollin motorik, shkathtësinë dhe organizimin e gjuhës”, shpjegojnë ekspertet neurologjikë.
Sipas tyre, shkrimi i dorës, ashtu si edhe aktiviteti fizik, “e mban trurin aktiv dhe të shëndetshëm, duke stërvitur përqendrimin dhe koordinimin dhe duke nxitur zhvillimin e zonave të rëndësishme cerebrale”. Në një epokë gjithnjë e më digjitale, Dita Botërore e Shkrimit të Dorës jep një mesazh të fortë: të heqësh dorë nga lapsi dhe letra shkakton pasoja për trurin, varfëron gjuhën dhe redukton procesin e të mësuarit.
