Ish-deputeti i Partisë Demokratike Ervin Salianji, ka kërkuar hetim ndaj ish-ministrave të Brendshëm, duke e cilësuar vrasjen e gjyqtarit Astrit Kalaja si një “goditje në themelet e shtetit” dhe një ngjarje “e paprecedent, e pandodhur as në vitin 1997”.
Duke folur në emisionin “Trialog” në RTSH1, Salianji theksoi se vrasja e gjyqtarit Astrit Kalaja brenda sallës së Gjykatës së Apelit të Tiranës, nga 30-vjeçari Elvis Shkambi, është një akt që duhet dënuar sepse sipas tij është goditje në zemër të shtetit.
“Së pari duhet dënuar nga cilido në mënyrë të ashpër të mundshme ky akt i kombshëm, një goditje në themelet e shtetit, një ngjarje e paprecedent e pandodhur as në vitin 1997 të vrasjes së një gjyqtari në sallën e gjyqit në momentin e dhënies së vendimit, jo vetëm duhet ndëshkuar nga ana ligjore por duhet ndëshkuar në publik dhe fokusi duhet të jetë te ky akt i cili po themi si fillim ka dhimbjen e madhe për familjen dhe familjarët”, deklaroi Salianji.
Ai kërkoi një hetim të thelluar nga Prokuroria dhe Gjykata Speciale, duke mos përjashtuar përgjegjësinë e rojeve dhe institucioneve.
“Së dyti, prokuroria dhe gjykata speciale të bëjnë një hetim të thelluar për këtë rast, për kolegët e tyre sepse nuk mund të hetohet dhe të mbajë përgjegjësi një roje ndërkohë që sot KLGJ doli me deklarata zyrtare që i ka kërkuar…nëse do të kishin funksionuar të gjithë elementët, nuk do të kishte ndodhur ngjarja. Ngjarja mund të kishte ndodhur jashtë mund të mos kishte ndodhur fare”, shtoi ai, duke iu referuar komunikimeve zyrtare të Këshillit të Lartë Gjyqësor (KLGJ) drejtuar Ministrisë së Brendshme për masa mbrojtëse ndaj gjyqtarëve nën presion e kërcënim.
Salianji adresoi kritika të ashpra ndaj Ministrisë së Brendshme që sipas tij i përdor punonjësit e policisë për fushata.
“Ka pasur komunikime zyrtare ku KLGJ i ka kërkuar Ministrisë së Brendshme që të marrë masa për shkak se gjyqtarët ndodhen nën presion, nën kërcënim apo kanë pasur informacionet e tyre për këtë rast. Ndërkohë që policët përdoren për të shpërndarë ujin në vitin 2023 dhe bënin video për propagandë për të shpërndarë ujin gjasme te turistët për mikpritje. E keni parë se si i mbajnë në fushatë elektorale, e keni parë se si e kanë vendosur policinë e shtetit në një anë kanë krimin dhe nga njëra kanë drejtues policie të zgjedhur nga krimi”, theksoi Salianji.
Salianji u shpreh më tej se për këtë rast duhen hetuar ministrat e Brendshëm pasi sipas tij këto janë ngjarje që mund të përsëriten.
“Së pari duhet të hetohen ministrat e Brendshëm, përfshirë ministren e Brendshme, po si nuk paska punë Ministria e Brendshme. Nëse nuk ka përgjegjësi konkret dhe hapërdahen gjithandej mund të ndodhë prapë”, tha Salianji.
