Një operacion i gjerë kërkimi është në zhvillim në qytetin e Bristol, pasi një i ri mbeti i plagosur rëndë nga të shtënat me armë zjarri në zonën Speedwell.
Sipas Avon and Somerset Police, autori i dyshuar është larguar nga vendngjarja me një biçikletë elektrike ngjyrë të zezë dhe gri. Ai përshkruhet si mashkull i bardhë, rreth moshës 18–22 vjeç, me trup të hollë dhe rreth 1.80 m i gjatë. Në momentin e ngjarjes mbante një kapuç gri, pantallona të zeza dhe një maskë.
Ngjarja ndodhi rreth orës 13:45 të së mërkurës (1 prill), kur u qëllua me armë drejt një automjeti në Speedwell Road. Zona, përfshirë Charlton Road në lindje të qytetit, u izolua menjëherë nga forcat e policisë.
Viktima, një burrë në të njëzetat, u transportua në Southmead Hospital me plagë të rënda, të cilat autoritetet i cilësojnë si “potencialisht që ndryshojnë jetën”, por jo kërcënuese për jetën.
Për arsye sigurie, disa shkolla pranë vendngjarjes, përfshirë Two Mile Hill School dhe Bristol Brunel Academy, u vendosën në izolim të përkohshëm (lockdown).
Inspektori kryesor James Clements deklaroi se policia ka angazhuar burime të konsiderueshme, përfshirë një helikopter të Shërbimit Kombëtar Ajror të Policisë dhe njësi të specializuara të armatosura, për të identifikuar dhe arrestuar autorin.
Ai theksoi se prania e shtuar e policisë në zonë do të vazhdojë edhe në ditët në vijim, ndërsa hetimet janë në zhvillim.
