Edukatoret e një prej kopshteve në Tiranë ishin të parat që iu nënshtruan testit të shpejtë për Covid-19 pas indicies së epidemiologut të zonës për shpërthim të koronavirusit.
Pamjet u shpërndanë nga Ministria e Shëndetësisë ndërsa kërkesa e ABC për të ndjekur një prej grupeve në terren në ditën e parë të aplikimit të testit të antigenit, u refuzua.
Kopshtet, shkollat, burgjet, shtëpi fëmijë, të moshuarish, qendra pritje janë të parat ku do të aplikohen testet e shpejta, dy javët në vijim.
Personat e tjerë të dyshuar duhet të plotësojnë disa kushte. Ato na i tregon epidemiologu Rexhep Muja.
“E gjithë popullata që kanë këtë klinikë , 1 deri në 5 ditët e para po ashtu edhe të sëmurët kronikë, po ashtu përfitojnë institucionet ku mendojmë se ka mundësi infektimi. Nga sot deri më 20 dhjetor do të jemi duke bërë përgatitje, më pas do të futet në rol mjeku i familjes”, u shpreh ai.
Testet e shpejta fillimisht do të aplikohen në Tiranë, vatrën kryesore të koronavirusit në Shqipëri rreth 10 mijë e 900 persona pozitiv dhe shtatë zona të nxehta të përhapjes së infeksionit.
Astiri, Lapraka, Kamza, Paskuqani, Kombinati, Ish Blloku dhe Fresku tregon epidemiologu Muja kanë numrin më të lartë të personave me koronavirus dhe për këtë ai ka një shpjegim.
“ Mesa duket atje nuk respektohen masat anti-covid. Më bën përshtypje sepse nuk shkon pa pasur 10 deri në 12 të sëmurë të tillë të dyshuar, kryesisht mosha 25-55 –vjeç janë më të prekura.
Aktualisht në të gjithë vendin numri i të infektuarve aktiv ka tejkaluar 20 mijë persona. Kryeson Tirana, Durrësi, Elbasani dhe Fieri.
