Presidenti i Kosovës, Hashim Thaçi ka theksuar se nuk ka plan gjermano-francez për Kosovën e Serbinë dhe sipas tij, duhet zbutur pritjet që aty do të ndodhë ndonjë marrëveshje a plan sekret.
Në një intervistë për Klan Kosova, Thaçi është në Berlin, s’do do të ketë as varrim as lindje, do të jetë takim krejt rutinor. “Nuk do të ketë as propozim për status special. Unë nuk jam optimist, jam realist, e di si shkojnë këto konferenca. Nuk do të ketë mrekulli”, ka thënë Thaçi në Zonën e Debatit.
“Takimi i Berlinit më shumë justifikon vonesat dhe paqartësitë që kanë brenda vetes shtetet e Bashkimit Evropian. Synimi i Berlinit duhet të jetë edhe unifikimi i shteteve të Kuintit. Kur pesë vendet e Kuintit, SHBA, Britania, Franca, Gjermania dhe Italia të jenë unike për vendet e Ballkanit Perëndimor, atëherë mund të ketë një zgjidhje”, tha ai.
Thaçi ka thënë se nuk mund të ketë marrëveshje finale ndërmjet Kosovës dhe Serbisë pa Amerikën dhe Mbretërinë e Bashkuar.
“Pa akterët kryesor, Amerikën dhe Mbretërinë e Bashkuar s’ka marrëveshje përfundimtare. Ritheksoj se roli i SHBA-së është i pazëvendësueshëm. Kosova ka besim të plotë dhe garanci, vetëm kur SHBA-të janë prezentë dhe mbështetëse. Ky takim në Berlin është i mirëpritur edhe në SHBA dhe ne duhet ta shfrytëzojmë si Kosovë dhe Ballkan Perëndimor”.
Ai po ashtu ka pohuar se zgjidhja ndodhet brenda kornizës së letrës së Presidentit Trump që kohë më parë ua kishte dërguar dy presidentëve.
“Në Berlin nuk do të ketë dialog, negociata dhe ballafaqim me përfaqësuesit serbë. Ajo që pres nga ky takim është konfirmimi nga kancelarja Angela Merkel dhe presidenti Emmanuel Macron, se do ta mbështesin Kosovën në liberalizimin e vizave”, tha ai.
