Presidenti i Kosovës, Hashim Thaçi, ka thënë se do të fillojë konsultimet me liderët e të gjitha partive politike parlamentare pas zhvillimeve të djeshme në Kuvendin e Kosovës ku u rrëzuar Qeveria Kurti pas mocionit të LDK-së.
Thaçi ka thënë se në konsultim me liderët e të gjitha partive parlamentare do t’i shoh mundësitë e krijimit të qeverisë së re të stabilitetit, unitetit dhe gjithëpërfshirjes.
“Pas rënies së qeverisë, si president i vendit, pa humbur kohë do të filloj konsultimet me liderët e të gjitha partive parlamentare, për të shikuar mundësitë e krijimit të qeverisë së re të stabilitetit, unitetit dhe gjithëpërfshirjes. Në çdo hap timin, si president i vendit, do ta respektoj në plotni Kushtetutën dhe ligjet e vendit”, ka thënë presidenti Thaçi gjatë një vizite në Batalionin e Mjekësisë së Forcës së Sigurisë së Kosovës.
Të mërkurën me mbështetjen e PDK-së, AAK-së dhe NISMA-s, Lidhja Demokratike e Kosovës ka shtyrë përpara mocionin dhe ka rrëzuar Qeverinë e drejtuar nga lideri i VV-së, Albin Kurti.
