Si arriti që Britania e Madhe, një nga ekonomitë më të mëdha në botë dhe shtëpia e një prej qendrave më të forta financiare në planet, të marrë hua më shtrenjtë se Greqia? Kriza e besimit që prek bonot britanike mban nënshkrimin e Kwasi Kwarteng, ministrit të financave të qeverisë së re. Sipas një analize të The Guardian, plani i tij bujar i uljes së taksave shkaktoi një shitje të paprecedentë në obligacione dhe aksione, por Kwarteng, ashtu si kryeministrja Liz Truss, deri një ditë më parë refuzonin të tërhiqeshin.
Profili i tij, siç përshkruhet nga The Guardian, tregon se ai nuk mund të kishte bërë ndryshe. Brilant, por arrogant, Kwarteng “kurrë nuk ka pasur as më të voglin interes për mendimet e të tjerëve”, thotë një ish-ministër.
Ministri britanik i Financave ka lindur 47 vjet më parë në Londrën Juglindore. Prindërit e tij, një ekonomist dhe një avokate, emigruan në Mbretërinë e Bashkuar nga Gana kur ishin studentë. Ai shkoi në Eton me një bursë dhe më pas në Trinity College, Kembrixh, ku studioi histori.
Ky besim i thellë në vetvete ishte i dukshëm që në moshën 18-vjeçare, kur ai u intervistua për të hyrë universitet. Profesori i ri që e ekzaminoi i tha se ishte hera e parë që intervistonte kandidatë. “Mos u shqetëso zotëri, ia dole shumë mirë”, i tha Këarteng në fund të intervistës.
Shumëgjuhësh, flet frëngjisht, italisht, gjermanisht, greqisht dhe pak arabisht, pas studimeve ai u punësua në City of London si analist për JP Morgan. Kwarteng ka shkruar libra historie dhe artikuj për Telegraph dhe ngritja e tij politike filloi në ditët e Theresa May si Sekretare e Brexit.
Prirja për arrogance, por edhe inteligjenca e tij e pamohueshme, është një temë e zakonshme që duket se citojnë shumë njerëz që kanë punuar me të.
The Guardian raporton gjithashtu një incident që ndodhi kur Bill Gates organizoi një tryezë diskutimi me shumë të ftuar të profilit të lartë. Kur Kwarteng u shfaq, ai filloi të sillej sikur të ishte në krye të takimit, “duke folur për gjithçka” dhe “duke i dhënë leksione” Gates edhe për temat për të cilat ai është ekspert, theksohet në analizë. “Ishte e çuditshme dhe e sikletshme,” thotë një person I pranishëm në atë takim.
SCAN
