Për këdo që e shihte në rrugët elegante të Battersea-t në Londër, Debora Krasniqi nuk dukej ndryshe nga nënat e tjera moderne të zonës, shkruan “The Sun”. Por pas imazhit të kuruar dhe jetës luksoze fshihej një realitet krejt tjetër: ajo ishte bashkëshortja e Flamur Beqirit, shqiptarit të përfshirë në krimin e organizuar, i cili u ekzekutua brutalisht në pragun e shtëpisë së tyre natën e Krishtlindjes 2019.
Beqiri, i shpallur më herët ndër më të kërkuarit në Suedi për trafik droge, u qëllua me dhjetë plumba përpara syve të Deborës, e cila në ato momente mbante në krahë djalin e tyre të vogël. Sulmi, që më vonë u cilësua nga prokuroria britanike si pjesë e një lufte të përgjakshme mes dy grupeve të mëdha kriminale suedeze, tronditi opinionin publik në Mbretërinë e Bashkuar.
Gjashtë vite pas atij mbrëmjeje makabre, Debora ka nisur një kapitull të ri, larg dhimbjes dhe të shkuarës së errët. Sot ajo jeton në Dubai dhe punon si juriste në firmën ndërkombëtare të avokatisë ADG Legal, me zyra në godinën luksoze Burj Gate Tower. Në profilin e saj profesional theksohet se i është bashkuar firmës në vitin 2023, me një diplomë të klasit të parë në drejtësi dhe një master në praktikë ligjore.
Burime të afërta me Deborën thonë se ajo ka kaluar një transformim të jashtëzakonshëm: “Ajo ka përjetuar një nga traumat më të rënda të mundshme. Por vendosi të rindërtojë jetën e vet nga e para – dhe ia doli,” tha për The Sun një person i njohur me historinë e saj.
Debora dhe Flamuri ishin njohur në Holandë, ku ai pretendonte se punonte në industrinë e muzikës. Ajo ka pohuar se nuk kishte dijeni për përfshirjen e tij në aktivitetet e paligjshme. Vitet e fundit përpara vrasjes, Beqiri jetonte një jetë të dyfishtë mes biznesit të muzikës dhe aktiviteteve kriminale, sipas autoriteteve suedeze.
Në natën e sulmit, vrasësi me pagesë Anis Hemissi – një kikboksier profesionist nga Suedia – i maskuar fillimisht me uniformë pastruesi rrugësh dhe më pas me maskë lateksi, u shfaq para derës së tyre dhe zbrazur armën mbi Beqirin. Ai u dënua më pas me burgim të përjetshëm.
Pas humbjes së bashkëshortit, Debora u zhvendos nga Londra dhe filloi studimet dhe karrierën ligjore nga e para. Ajo ka punuar më herët në fushën e parandalimit të pastrimit të parave në Londër dhe ka drejtuar disa kompani të vogla konsulence dhe pasurish të paluajtshme, sipas të dhënave të LinkedIn.
Sot, në Dubai, Debora merret me çështje të mëdha ligjore që përfshijnë klientë të profilit të lartë nga e gjithë bota. Historia e saj shihet si shembull i një rikthimi të fortë nga trauma drejt një jete të re profesionale, larg hijes së të kaluarës që dikur e përndiqte.
